黃宗澤（Bosco）、謝天華、陳法拉同徐子珊等一班無綫新劇《潛行狙擊》嘅演員，前晚喺尖沙嘴舉行煞科晚宴，之前被偷拍「晒雀」照片嘅Bosco剃晒鬚出現，見佢心情平復咗唔少，仲識得講笑㖭，自嘲話如果劇集之後好收視，唔使問佢着唔着泳褲同裸泳慶功，因為大家已經睇過晒。雖然佢講起就好似冇乜嘢，但係佢都直認如果獨自一人時都會回憶起件事。
杏兒讚男友樂觀
馮仁昭話不如露股拍戲，Bosco話拍戲就OK喎，完全冇問題。至於同胡杏兒有冇因為今次事件感情更進一步時，佢就好避忌話：「都係咁上下，唔只佢，我媽咪都有擔心，之前都唔敢問我呢件事。佢（指杏兒）冇我，呢啲靠自己，乜人都冇用。」噚日返電視城開工嘅胡杏兒就大讚Bosco性格樂觀，都相信Bosco已經放開懷抱，不過講到兩人感情係唔係有進展時，杏兒又連聲否認，仲話：「唔講呢啲。」
此外，有份拍《潛》劇嘅天華就話唔會頂替Bosco着泳褲：「泳裝冇人睇，可能密實有人睇呢，佢可以搵好朋友頂，我就唔制。我呢排守身如玉，佢都露咗，無謂再露。」稍後天華開拍電影版Laughing哥續集，仲會操弗自己。