【專訪】陳振聰被控偽造罪及使用虛假文書罪的案件，本周五將會再提訊，過去一段日子，他每星期有兩天要到歌賦山住所附近的山頂警署報到，還忙於與律師和軍師商討對策。官司連連、個人形象負面到不能再負面，但陳振聰堅持清白：「如果真係會坐監，我嘅字典裏頭真係會有寃獄呢兩個字喇！」陳振聰，龔如心遺產爭奪戰的男主角，也許是本港開埠以來最具爭議性的被告。
記者：何凱兒、黃偉駿
接受訪問，陳振聰只求一個「畀我講番幾句」的機會，不用幫他，但也不要「踩多一腳」。這次，由他尚未知道警方有甚麼證據起訴他說起……
「警方畀我嘅鑑證報告資料唔詳盡，係咪應該畀被告知晒所有資料？」他質疑警方調查方法：「06年遺囑上面有幾十個指紋，多過三分二對比唔到，喺我立場梗係認為呢啲係龔如心指紋。但警方淨係用龔如心有紀錄嘅三隻指紋做對比，係咪應用返龔如心過去嘅文件，搵埋其餘七隻手指嘅指紋？」談到那份令他「一身蟻」的龔如心06年遺囑，他高呼受屈。
後悔公開親密關係
「對住鏡頭我都係咁講，我家仲未知警方用咩證據去告我。」為求沉寃得雪，陳振聰明日會在幾份報章刊登全版廣告，懸紅可能是本港私人紀錄最高的1,000萬美元，尋找龔如心的指紋樣本、親筆簽名文件等證據。
由大有機會入主華懋王國，到如今隨時淪為階下囚，陳振聰仍沒後悔發動爭產戰，唯一後悔的，是公開了與龔如心的親密關係：「原來唔一定公開，都可以執行龔如心畀我嘅指令。」他又自嘲：「假如我是一隻狗，又點識得同人講呢？世界上好多人，都想將自己嘅嘢畀自己嘅寵物喎，寵物一樣可以有擁有權。」
政商界盛傳龔家獲北京「撐腰」，更言之鑿鑿指北京要他入獄，連立法會議員梁耀忠也私下向他忠告「無論點打你都唔會贏」，陳振聰說種種傳言令他無限驚訝：「第一，呢個係一個傳說，第二，祖國法律都好完善，同埋呢件事唔係好嚴重，係咪真係要行政干預呢？」是否想過坐監？「生活喺香港，我對司法制度有信心，自己真係冇犯罪，所以冇作出被定罪打算……如果真係會坐監，只能證明我嘅字典裏面真係會有寃獄兩個字！」
「慳得一蚊得一蚊」
市場傳言他金融海嘯炒蒙古能源輸掉5億元，早前嫌涉偽造遺囑案又要家人籌集2,000萬元保釋金……恍如山窮水盡。陳振聰承認現時是「慳得一蚊得一蚊」：「條路咁長，前程未卜，仲要應付咁多場官司，唔係好玩嘅事。」
私人飛機、遊艇等身份象徵，他承認已易手：「兩年前賣咗飛機，應付金融海嘯損失，減少好多支出。遊艇都賣埋，我係好鍾意出海曬太陽，但家邊有心情？開源都難，梗係先節流。」他說私人飛機經飛機公司放售「個價賣得幾好」，至於那隻遊艇，他默認被人壓價。
爭產案初期，陳振聰塑造自己成神秘富豪，首度曝光，便是從私人飛機走出來。今日他卻聲稱，買私人飛機「唔係要威或者炫耀」，只是一圓兒時夢想，加上曾向龔如心承諾在「青天碧海」翱翔，「買架飛機係諗住自己可以學埋駕駛，點知未到高峯已劇終……」
龔如心生前給予陳振聰的金額超過20億元，為何仍要跟龔家爭產？「我唔係為錢，只係想執行Nina（龔如心洋名）一個小小願望。」公眾定論他有預謀利用不倫之戀，但他堅持不是外界所想的「男女關係」，「Nina係一個我好愛嘅人，我哋相處好開心，佢好鍾意講嘢，我又鍾意講嘢，我哋兩個傾偈，由第一分鐘傾幾個鐘都唔停口，天南地北，買衫、買咩玩具啦。」連他自己也承認「講都冇人信」。
他又強調，兩人從來講心唔講金，「佢只會靜靜放低（錢）畀我……初初識嗰陣，某晚傾偈，佢話我係有啲錢，你又真係好窮，我要咁多錢都冇用，你又可以唔使咁窮，不如交換嚟喇！」自此，10多年陳、龔「有實無名」的夫妻關係正式展開。
陳振聰受訪期間金句
‧「如果真係會（坐監），只能證明我字典裏面會有寃獄兩個字。」
——談到被控偽造遺囑時，陳振聰堅持無罪。
‧「未到高峯已劇終」
——陳振聰形容他還未學會駕駛飛機完成兒時夢想，便已將飛機出售。
‧「我係有啲錢，你又真係好窮，不如我哋交換嚟啦。」
——陳振聰憶述龔如心與他初相識時，對他說過的一句名言。