暑假期近，見到學生豪，問佢跟爸媽去邊度玩，學生豪話：「我咁好彩係第一屆文憑試考生，明年就要一試定生死，學校啲書教唔晒，成個暑假都要返去補課做功課，邊度都冇得去。」咁慘呀，乜學校老師咁差o架，教書教唔晒？課程編排冇計劃啫啩。學生豪嘅七嫂係高中老師，聽到就非常勞氣：「哦，乜都係我地老師錯？收書商教材就係我地貪心，我地懶，唔識得自編教材；教唔晒又係我地懶，冇計劃，學校有學生天生閱讀困難症，追唔上語文科，係我地錯，搞歧視；班上有單親學生行為異常，可能索K，又係我地疏忽，冇照顧。總之樣樣都係學校錯，老師錯，教育官員從來不錯，唔准我地收教材，點教書呀，叫陳維安、張國華到學校教啦！仔女讀聖保羅男女，德瑞學校嘅家長，邊度知道我地平民學校嘅苦況呀？」
幾乎所有教師都批評教育局編排高中課程錯誤，又多又深，大概教育官員以為每位學生嘅每一科都有一位補習先生跟住都唔定，貴族學校聽講就係咁嘅。
畀得起錢嘅富裕家庭與高級中產亦有一本難唸的經，佢地想送學生入一間「人人都有幾位補習先生」嘅大名校亦不容易，要由懷胎十月時就做好策劃，一步不能錯，辛苦過乜。樣貌得天獨厚，七幾年從港大畢業，行將一甲子，但仍然貌似四十許嘅公關P抱着BB行街，人人以為係佢嘅仔，其實係佢嘅孫，今年孫兒兩歲咯噃，乖女與女婿自美國回港居住工作一段時期，想話入海怡半島一間巴閉到極嘅學校（幼兒園），學校要父母提供美國幼兒園老師嘅「幼兒評估報告」，公關P為之愕然，兩歲人，有乜evaluation值得參考呀，麻煩一輪，公關P開過家庭會議，決定孫兒不上學，留家自己教。公關P位千金當年以優異成績考入哈佛後到牛津讀博士，女婿就係哈佛──牛津──劍橋，佢地讀幼稚園時，只不過係咁意上堂，但今天情況完全唔同。我地聽到，心生一計，同公關P講，但公關P一早諗到，唔駛我地詳述，計仔就係由佢嘅女與女婿出版一部書，書名可以叫做「如何從劍橋到牛劍（FromCambridgetoOxbridge）」（哈佛位於麻省劍橋），可惜趕唔切在書展應市，否則會暢銷過甚麼「哈佛女孩」、「耶魯男孩」！