不知是否近年懷舊風氣越吹越熱，任何方面都來一招復古，就如超八拍攝，一向是小眾潛水玩意，卻漸有浮面之勢，無論電影、MV都見其芳蹤，連讀電影的學生都專登借機拍攝畢業作，似乎年輕數碼一代對這個六七十年代的產物仍懷有激情。
記者︰吳美美
攝影︰伍慶泉、楊錦文、陳陶鈞、林栢鈞、譚盈傑
Model︰Tiffany@Starzpeople
鳴謝︰香港演藝學院電影電視學院、AfterSchool（29832130）
未知最令人期待
「超八成個運作過程係好浪漫，因為內裏有很多uncertain嘅東西，用嘅都係古董機，每部都有自己嘅特性，經歷過唔同嘅故事，每部都唔同性質，無論走光、曝光又或者係齒輪轉動，每一次拍出嚟，你都唔肯定係唔係自己喺viewfinder所見到嘅嚟，咁所以個unknown再加人為係做唔番佢嗰種效果。」從來未知就係最令人期待，亦係最好玩嘅事。
超八為麥婉欣帶來的肯定不只浪漫，亦是她在電影界發展成長的目的地，「超八對我來說是morethan一個純技術性的東西，不是單一一種物件，這部機同時目擊咗我嘅創作路程，尤其是第一次拍嘅《哥哥》，因為去青海本身是一件好嚴重嘅事，因為是我第一齣電影，而這部機器拍咗嘅嘢又唔知係唔係拍咗落嚟，所以返嚟見到幾個月前發生嘅事，加上佢嘅質感，是驚喜加上驚喜。」
前輩們會利用超八作不同的實驗，麥婉欣都唔例外，不過佢有一本八米厘手冊指導佢，「應該是六十年代頭，日本出品，全日文，裏面教你很多tricks，例如加個filter扮有隻怪獸噴火，然後怎樣double-exposure產生一啲效果，我都試過晒，但做不到咯，哈哈哈！」麥婉欣亦會做發燒友會做的事，就係燒菲林！「我仲有部紀錄片未出過街，就係我同一個日本女演員，以一個ontheroadtravelog形式進行，拍咗好多好多好多roll，我哋買落咗好多菲林，過期嘅都有，有三十幾roll。」嘩！真係期待燒出嚟嘅效果。
麥婉欣私伙
每一take都會較執着
新一代的又有幾個接近過「想當年」的高科技呢？就讀於演藝學院電影電視文憑課程的阿勤與阿Ken，他們的畢業功課就用了超八拍攝，為何棄數碼用超八呢？「其實電影呢樣嘢追溯番應該係用菲林。」但用慣數碼機器，自動zoom自動focus，來到超八面前卻要自己一手包辦，阿Ken形容拍攝時是戰戰兢兢的，「最唔同就係睇唔到個影像，對focus都要自己拉尺去度，唔似現成相機可以睇吓準唔準，另外演員個走動位大家都好驚，例如我哋有幾個shot喺好遠距離，可能要橫跨成條馬路，度尺時就攔腰咁截住啲車，又要搵人睇水，又好多人圍觀，呢啲真係好難忘。」
iPhone都有超八app，點解唔用先？「都有同學話用呢個app咪得囉，但相似度只有一半，第一秒望落去會有啲似，再睇落去就假假哋。」問題就喺呢度，依賴數碼生存的一代，對於拍攝是有點「似咪得囉」「差唔多啦」的心態，但阿勤和阿Ken認為用超八慳住慳住的情況下，對每一take都會較執着，可以鍛煉加強對拍攝的認真度，自己會加倍投入精神專注，因為可能會隨時無菲林，失預算。
