藝人形象有時需要悉心打造，不過有些人企出來就被人定為某類型人，想改變別人的想法，唔係咁易！就好似《誰家灶頭無煙火》嗰位年輕廚師陳智燊Jason，擺個樣出來已係中產乖仔。講起車經時，他強調自己曾是個愛飆車的死靚仔，不過眼前的他官仔骨骨，說話慢條斯理，但他反而語出驚人：「我最愛大股。」
記者：趙慧敏
攝影：伍慶泉
貫徹無車主義
一套《誰家灶頭無煙火》，將Jason由一個滿口標準英語的明珠台主持，變身為師奶們心目中的乖仔。今年33歲的他，身高五呎十吋，笑容總帶點靦覥，計我話唔只係師奶最愛，連我身邊的女同事都對他產生濃厚興趣！為順應同事要求，就相約他試車，時間左度右度下，終於在一個攝氐33度高溫的下午，Jason收工後乘的士匆匆趕至，來到一刻才知他竟是無車階級，過去更未曾擁有過屬於自己的一架車！雖然他自己無座駕，幸好駕駛經驗絕對足夠，喺英國倫敦長大，要揸車有大把機會，「我十六歲已考獲車牌，之後揸爸爸架標致106，車細易操控，啱晒新牌仔，到十八歲爸爸就換咗部標致206，動力好了，當然覺得自己技術進步咗，開車時都快咗，最鍾意同朋友由倫敦揸去附近城市。」
睇Jason咁斯文，開車都一樣？「唔係！成班朋友出去兜風，成隊車隊咁，自己梗唔想甩啦，好自然越開越快，有次差啲發生意外，有架車喺小路駛出，差啲炒車，我踩Brake踩到打白鴿轉。」談起車經時，Jason猶如車神上身，不過他樣子總想話畀人知他係一個乖仔，我努力打沉其努力經營的曳仔司機形象，不停問鍾唔鍾意飄移？有無同人鬥車？終於Jason投降了，「其實我班英國朋友都唔係鬥車，只係柴娃娃成班人去玩，飄移更加無人識，英國嘅鬥車文化始終唔同香港！」死靚仔又變回乖仔了！
少年夢想號MX5
不過講到少年時代最鍾情車款，當然離不開跑車，其中頭號DreamCar是MazdaMX5。不過今時今日他自言已大個仔，買車要實際，歐洲車夠穩陣紮實，且要揭背式設計，貪多多雜物都放得落。至於現時他最有興趣的，原來是法拉利的FF，不過最討Jason歡心竟然唔係澎湃性能，而係FF有個超大尾箱同四座位設計，至啱佢買車要實際嘅原則。
對於豪華房跑始終非他所熟，遇上AudiA7Sportback，當Jason甫坐於司機位，就讓人完全感受到他躍躍欲試的慾望，事關當拍完照片講完車經後，Jason已不斷摸索車廂內不同按鍵功能，當我提出可試揸時，竟發現在Jason面上出現與他年紀不符的童真笑容，雖然只在九龍塘兜上幾圈，不過揸起車來還是小心翼翼，且大讚A7的MMI多媒體系統、Start/StopSystem等，確令他揸起車時更輕鬆。
A7Sportback
引擎：2,773ccV6
馬力：204hp/5,200rpm
扭力：280Nm/3,000-5,000rpm
傳動：7前速S-Tronic半自動波
售價：$753,040
查詢：25281862（合迪汽車）
