現今世代，人人一機在手，拍乜影乜記乜全賴手上電子產物，輕輕鬆鬆按下按鈕，就將自己人生高低起跌大事小事放任記下，內裏記憶體之大令大家無後顧之憂，狂拍怒影都不成問題。鏡頭轉至七十年代，數碼還屬遙想，要將眼前重要事記低，當時的超八（super8）幫了人們一把，還成就了他們的電影夢。
記者︰吳美美
攝影︰伍慶泉、楊錦文、陳陶鈞、林栢鈞、譚盈傑
Model︰Tiffany@Starzpeople
章國明：放部超八喺袋隨時拍
「嗰陣時我隨時放部超八喺袋，隨時拍o架！」當聽到有人說這句話時，還以為所講的超八是iPhone。
實際上，超八是一部行菲林的攝錄機，所用的菲林僅限於3分20秒之內，當時人們對菲林是熱切愛惜，重視它的矜貴度，不過說白一點，還不是大家都窮窮地，要將就將就，想不斷地拍的話，就注定餐餐菠蘿包。
談到超八，不找前輩章國明先生的話就有點兒說不過去，作為上一代「超八達人」的他，在拍攝人人讚好的《點指兵兵》、《邊緣人》等電影時，亦於1972年以八米厘拍攝有《不速之嚇》feel的《異世之所》，前前後後無間斷地以超八做實驗拍電影，「嗰陣時每個星期日，朋友都去晒旅行，我就成日群埋一班朋友諗古仔或唔諗就走去拍八米厘，不過都係慳住拍，記得當時一餅帶要十八個半。」當時他在麗的做導演是八百幾蚊一個月。
順帶一提，開首那句說話就是他說的。
拍完好似開獎咁
章國明邀我們到家中作客，經常笑意盈盈的他，拿着PS3控制器，播放過往自己以超八拍下的片段，如在麗的年代工作時的幕後花絮，着實做到了超八當時存在的意義，就是能讓人們當下記錄身邊事。現時買部iPhone都要幾千銀，何況倒帶幾十年前的超八機，千幾蚊是必需，不過章國明是幸運的，因他第一部超八是免費的，「因為姐夫做廠時有部機叫Hanimex，只是手掌咁大，光圈有幾個俾你選擇，你又唔會見到影出嚟嘅效果係點，要靠估，例如你見到家咁嘅天氣（當日黃色暴雨警告生效中），要自己估用邊個，最大都是5.6。所以，以前拍完之後都覺得係開獎咁，意思係你拍呢齣戲唔知道得唔得，冲好啦，就開獎，呀！得喎，就好開心，呀！唔得喎，就下次拍得好啲。」二十一世紀數碼年代，仲使乜唱呢支歌仔，唔得呀？DeletePlease！
16歲狂得犀利
隨手即興攝下面前事，除了成為習慣，還會變成興趣，繼而成就個人事業。章國明的電影事業就是由八米厘引發，「我不知道是我代表八米厘，還是八米厘代表我，我就是由八米厘開始玩電影，當時我是日玩夜玩，狂得好犀利，有啲會好即興，有啲有計劃，又會拍MTV，甚至animation都會拍，即係一格格咁畫公仔。」16歲開始影八米厘，他強調當時覺得自己變咗另一個人，是變得好厲害，因為身邊的大人們都突然對這個拍八米厘兼自製投射大螢幕的「o靚仔」另眼相看，嘩嘩聲之餘，態度更180°轉變，由指住佢個鼻講嘢，變成走過嚟指住自己個鼻講，「俾我做主角得唔得呀？」八米厘帶給章國明的不止是加強走入電影世界的決心，還有其後成為導演所需的自信。
佢係我嘅古董
怎樣說好呢？每個人應該都有些事與物見證自己的過去，現時八米厘在章國明眼中是甚麼呢?「它現在的責任唔係影嘢，而係用來講佢嘅歷史，仲有就係話俾人聽，佢係我嘅古董，因為對我來說它的成本效益太低，貪得意都仲可以，但真係似玩古董，即是好似用康熙嘅碗嚟食飯。」這樣的比喻實在貼切。
有否發現，用超八拍片或以之融入電影MV中的風氣漸成，章國明又怎樣看待新生代們「用康熙碗嚟食飯」的情況呢？「可能佢哋之前未玩過八米厘，就覺得八米厘好特別，我就唔係，我係玩個唔停，好似家屋企呢一大堆都是我嘅八米厘片，影到自己知道八米厘的好處同唔好處。講實用性，家嘅數碼真係正好多好多，就算拎個康熙碗嚟食飯，你唔會拎嚟日日食，係會有次成班朋友，嗱，呢個碗就係康熙年代嘅碗，大家好好哋慢慢食，食嘅時候小心啲唔好打爛個碗，好麻煩，家就是但拎個碗出嚟，食完就丟咗佢，開心吓就得啦，即係八米厘實用性唔強，但情緒上會覺得呢樣嘢好特別。」
康熙與八米厘原來都扯得埋，電影人的想像空間真係好闊，好闊。
黃國兆：不是HomeMovie咁簡單
與章國明同年代，都有玩八米厘的，還有資深影評人黃國兆先生，他用八米厘所攝製的《學生日誌》，講述一位中五學生準備會考時的情況，現收藏於香港電影資料館之中。
黃國兆將當時拍超八的人分為三種類型：第一批就是用這個媒介表達某啲事情；第二批就真係鍾意超八，想拍啲古仔，甚至模仿商業電影；第三批就是搞實驗性，未必用來講古仔，但可能會在菲林上畫公仔。而他就是想用超八創作，講一啲事情，並不是純粹用來拍遊記等等homemovie咁簡單。
夾份買機搞實驗
可能大家會將「拎八米厘拍實驗電影」的事情想得太簡單，過去與現在的差距太大了，「一部機走天涯」這話兒，只有現在才能實現。所以，黃國兆就與三位朋友夾手夾腳利用超八拍電影，做實驗，你負責拍攝時，我就負責做演員，還有買腳架、收音，最緊要夾份買部超八。黃國兆還想起當時拍《學生日誌》，利用超八做到了當時香港未有人嘗試過的凝鏡效果，「我哋之中有一位對於拍攝好發燒，佢將超八一個好細微的菲林格抽咗出嚟，再用色盲片抽咗出嚟變成底片，再放大成一張相，之後我哋就翻拍呢一張相，而造成一個類似凝鏡嘅效果。」家陣一部電腦就搞掂晒，仲需像從前般想太多嗎？拍過的就知當時難度高，所以，當講起《S8驚世檔案》時，黃國兆就覺得裏面內容有點作大，「真係有啲誇張，嗰個年代小朋友拍超八邊會又收音又腳架全部齊晒，同年代喎，雖然佢哋係美國人，我諗嗰陣時章國明拍超八都無咁犀利啦！」
都說超八的產生是想將之打入尋常百姓家，就是能隨時拍下值得紀念或有趣的事情，黃國兆亦在到外地留學時讓超八跟身，諗住一機傍身有點氣勢，點知……「訪問之前我諗嚟諗去，部超八究竟去咗邊，其他舊相機例如風琴式相機我都想珍而重之留喺度，家先省起原來我喺法國讀電影時，初初我仲有部機喺度，嗰陣我仲做緊個實驗，就係將部機打橫拍，因為想將啲片變直度，希望做到國畫效果，但應該讀到第二年時就俾人偷咗。」真係欷歔，須知一部超八價值對當時後生仔嚟講唔係平，唔見咗，唔可以好似家咁隨時分期買過部。
