【本報訊】香港寸金尺土，要留住歷史文化古蹟不容易，何況要留住保育價值不大的殘舊廢墟？但原來香港四處都有不為人知的廢墟，有80後攝影發燒友特別鍾情這些建築，在網上組團前往探險拍攝，成立的facebook粉絲專頁「廢墟攝影」，短短一年已吸引4,000多人加入，在網上世界大熱，甚至有台灣網友親自來港，希望用鏡頭留住這座繁華城市正在消失的一面。 記者：盧勁業
長沙灣屠場、元朗荒廢幼稚園、錄影廠和氣象台……「廢墟攝影」創辦人Ken如數家珍地向記者介紹香港「廢墟」，30多座廢墟分佈港九新界，他說：「本來我只係抱住玩嘅心態去搞活動，想發掘吓香港城市嘅另一面，但結果發現除咗高樓大廈，香港仲有不少廢墟存在。香港地方唔大，要影嘅地方都影過。廢墟畀我神秘感覺，所以就嘗試將攝影同廢墟題材組合成廢墟攝影。」
近年有關保育及集體回憶議題的爭拗，如清拆皇后碼頭引起衝突，多次成為社會焦點，群組舉辦了約10次活動，次次爆滿，參加者絕大部份是年輕人，希望了解這座城市的過去。
新界多廢廠廢村
本身是80後的Ken說：「香港嘅廢墟同日本或者台灣嘅唔同，日本會將有價值嘅廢墟變成景點。香港嘅廢墟會隨時被拆卸及夷平另作發展，我想喺廢墟消失前拍下做紀錄。」又說：「市區寸金尺土，好多廢墟都被拆重建了。現時所知大多數廢墟都係分佈喺新界地區，因行業轉變留下荒廢廠，或者係村民遷出市區而留下廢村。」
眾多廢墟中，令Ken印象最深刻的，卻不是甚麼大型壯觀的廢墟，而是一間幼稚園，「有一次活動去咗洪水橋附近嘅一間幼稚園，影相時見到學生遺留嘅家課冊、班相、校訓等物件。我哋查看咗相關資料，發現幼稚園並唔係荒廢咗好耐。有畢業學生喺粉絲頁留言，同其他同學相認」。這間幼稚園現已被拆掉發展，「幼稚園存有好多人嘅快樂回憶，實在係可惜」。
嘆多人破壞生態
「廢墟攝影」的運作相當有組織，Ken說：「我主要係維持粉絲頁內嘅大小事務，搞event聯絡及對外，而其他朋友會發掘新地點、上網搜集資料同埋預先探路。」入廢墟拍照會否危險？「我哋出發前會有安全評估，同時會用googlemap/streetview呢啲工具喺網上plan路線」。
Ken表示，隨着近年攝影門檻越來越低，越來越多人為拍得好照片而破壞廢墟，「廢墟有自己嘅生態環境，雜草亂生，小動物、昆蟲都有佢哋嘅落腳處，畀呢啲生態自然發展，去探索時唔好留低垃圾打亂或破壞佢哋，令其他人亦可以睇到相同嘅廢墟原貌」。
廢墟攝影網址： http://www.facebook.com/cityruins