做咗公益金執行委員會主席多年嘅「股壇教父」李業廣，上個星期終於完成交棒大業。教父功成身退，大會選咗恒生銀行（011）副董事長兼行政總裁梁高美懿，接掌執委會主席。梁太自09年4月起，已經擔任公益金籌募委員會主席，今次更上一層樓，坐正做執委會主席。
華華記得，人稱「柯大俠」嘅恒生前任CEO柯清輝，任內最勁都係出任公益金籌募委員會主席。不過，柯大俠任籌款大使時，做到鞠躬盡瘁，扮鬼扮馬，募捐好似「卒數」咁落力，難怪獲特區政府頒發銀紫荊勳章。除咗梁太，恒生總經理馮孝忠早前亦獲選為公益金籌募委員會委員，同「公益服飾日」籌劃委員會主席。