余文樂相隔6年再出碟，前日佢專程到重慶某商場為國語碟《不是明星》搞簽售會，當日約10點已經有fans到場霸位，甚至有fans由成都坐9個鐘長途車到場。
商舖被逼落閘
部份未能逼入商場嘅fans想盡方法逼入去，結果搞到商場人頭湧湧，唔少商舖惟有被逼落閘。除咗商舖落閘，現場嘅大型鐵馬都俾啲fans推倒，阿樂喺台上見到咁混亂，都要出口叫fans冷靜，好彩啲fans都乖乖肯聽話。
由於現場人數太多，大會一度要求阿樂喺限定時間離開，但係阿樂一口拒絕，堅持要簽完近500個fans先走。其間又有幾名fans飛擒大咬想撲前攬阿樂，最終有一個趁大家唔為意時突圍成功。另外大會安排一位之前因意外受傷嘅fans以特別嘉賓身份出現，阿樂即場送上鼓勵，佢仲緊緊擁抱住fans以示支持。
另外，由於阿樂同何韻詩經常喺網度以男女朋友相稱，內地傳媒問佢哋係咪真係拍拖？阿樂話：「我們是好朋友，很好的朋友，只是開玩笑，大家不要太緊張。」