加拿大政府驚國民「買棺材唔知價」？冇錯。
皆因楓葉國政府宣佈，會將國民用喺喪禮嘅使費計埋入消費者物價指數（CPI，即係通脹）。當地政府每隔4年，就會將計算通脹嘅一籃子消費品執一執，等個CPI更加正確咁反映國民消費習慣變化。今次就加入咗當地市民用喺殯儀、智能手機同零售店會籍嘅使費。即係以後啲棺材、壽衣，甚至元寶蠟燭開支，都計埋喺通脹，比重仲佔0.2%㖭。
加拿大政府消費者物價部嘅經濟師MarcPrud'homme話，呢個決定係根據開支調查而做。照咁講，如果楓葉國市民百年歸老要風光大葬，咪變相推升當地通脹！