源於英國傳統嘅太平紳士（JP）制度，特區政府回歸後依然沿襲，每年七．一，均委任大棚社會賢達做紳士。呢期公佈嘅名單，唔少乃金融界中人，包括渣打（香港）一哥洪丕正、李國寶細仔兼東亞銀行（023）副行政總裁李民斌。仲有過檔新地（016）做執董嘅前恒生銀行（011）「掌櫃」陳國威，同埋資深財資人兼恒生總經理馮孝忠。
金管局都有兩位女高層膺此殊榮，分別係負責外事部嘅助理總裁朱立翹，同銀行操守助總戴敏娜（Meena）。律師出身嘅Meena，就係當年立法會雷曼聆訊中，坐喺前老闆任志剛旁邊嗰位混血靚女。證監會署理行政總裁林張灼華，亦榜上有名。
金管局兩女將上榜
華華早前提過，北上學國情嘅「中國國家行政學院香港工商專業同學會」，聽聞除咗馮孝忠，仲有位陳姓企業家，今次齊獲委任JP。呢個會員過百、由金融保險旅遊物流界組成嘅聯誼會，稍後可能整餐飯局齊賀「同學仔」。