唔好以為外資大行就好容易請人，單講資深地產分析員家陣就非常渴市，完全無受樓市轉淡影響，連大行都要周圍挖角撬人，變成新打工皇帝。
EvaLee頂替王震宇
華華聽聞，瑞銀地產分析部阿頭王震宇，同摩根士丹利部份地產分析員，早喺三、四個月前離職，兩間行搵咗幾個月都未搵到合適人選填補空缺，尤其係睇香港地產股嘅人才就更難搵。
直至最近，瑞銀先成功喺麥格理挖角，撬走EvaLee頂替王震宇個位，搞到麥格理要周圍搵人。據聞，EvaLee嚟緊9月就返新工，至於大摩聽聞仲喺尋覓階段。
早10年，睇香港地產嘅分析員頭上好似有光環，大摩卓百德同瑞銀林奮強兩位星級分析員，更係業界佼佼者。兩位仁兄一出研究報告，基金經理同傳媒爭相拜讀同報道，皆因佢兩位嘅觀點，隨時郁到地產股，認真唔講得笑。
自從兩位仁兄由sellside轉做buyside，已經無邊位稱得上星級地產分析員，有超過10年經驗嘅香港地產分析員更係買少見少。有老友同華華講，做sellside要成日飛去路演，好多時朝早起身都唔知自己喺邊！加上無乜投資者唔熟悉香港樓市，做推介時吃力不討好，所以唔少分析員做做吓寧願轉做buyside或者另謀高就。
李華華
mailto:[email protected]