香港中旅（308）挨近海嘯價，又係超級現金牛，唔怕收集。中旅揸住現金近25億銀，貸款得3.1億銀，淨現金挨近22億銀，係超級現金牛。
集團由上年10月到家陣，累積跌咗35%，現價（1.35元）相對08、09年時海嘯價約1蚊，已經唔差得好遠，真係冇有好怕。再講，中旅現水位相對NAV2.10元折讓36%，貼近以往歷史低位。而NAV仲未完全反映集團手頭優質酒店嘅實際價值。加上集團酒店業務受惠旅遊業好景，單係今年頭4個月收入，已有雙位數增幅，照睇，呢一瓣亦有分拆上市嘅潛質。連埋呢啲因素重秤，中旅NAV折讓，邊只呢個水平。呢轉睇實1.25元1年低位，中旅再跌好收集，擺中線，博上番NAV，潛在回報近70%。
百仕達叠水博賺20%
百仕達（1168）上年尾手頭現金49.15億銀，扣埋貸款及可換股債約8億銀，淨現金仍然高達41億銀，即係相當於百仕達每股1.16元，高過集團現價（0.82元）。又呢期阿爺調控，百仕達CashRich，更加有利集團內房業務任何併購發展。呢轉短打，亦係咁易博集團升20%到0.98元，仲未有耐上到NAV1.87元呢個水位。
錢雋