Google+社交網　抄襲五宗罪

Google+社交網　抄襲五宗罪

搞網頁搞到可以拍電影兼俾唔少財主吼實嘅facebook，已成功話畀世人知，網上虛擬社交網絡分分鐘仲賺錢過現實世界，難怪不斷引嚟唔少人挑戰，最近另一網界巨頭Google都話要踩過界，推出測試版嘅Google+，玩盡社交之能事，但似乎好多功能都熟口熟面囉！

記者：王震遠
攝影：陳盛臣
Model：Rain@InterplayWorkshop

第1罪
Circles抄facebook！搞小圈子

唔知幾時開始，上班族就習慣咗返到公司，第一時間一定係開住facebook，不斷同朋友左Chat右Chat，入Pantry講是非就擺到上網講。不過隔牆有耳，所以fb推出咗社團（Groups）功能，但是無獨有偶，Google+竟然都向佢致敬。
雖然真係有幾分社團影子，但Google+同facebook理念有所不同，後者鍾意凡事公開，前者則以私隱為重。為咗唔想啲個人訊息落入是非精手上，所以Google+新推出嘅Circles功能可以俾用家將朋友拉入唔同小圈子之中，預設有朋友、家人、點頭朋友等等，仲可以自定小圈子。分好類別之後，小圈子內嘅留言只有圈中人睇到，咁樣同朋友、同事吹水，抑或分享資訊都方便啲啦!

■預設社交圈有朋友、家人、點頭朋友等，更可以自定小圈子。

■新加入的社交圈功能，可以將不同朋友分類為唔同圈子。

■用小圈子功能吹水，無論講人是非定避開攪屎棍都用得着。

第2罪
Hangout抄Skype！視像蒲頭

朋友唔係時時都有空見面，但由於經常坐喺電腦面前，所以當有視訊通話嘅出現就解決咗呢個問題，電腦平台有Skype，只要有Webcam就可以隔空見面，不過要雙方都裝咗軟件先Connect到。
Google+功能Hangout真係有樣學樣，直情將視像功能結合埋社交網絡，不過抄唔足，改為網頁版，唔使裝軟件就玩到VideoCall，仲支援到多人一齊視像通訊，方便到咁真係以後唔使一齊去蒲啦!

■Hangout同Skype一樣，網上視訊通話支援多人聊天，唔使出街都可以在網上見面。

■Hangout可以玩視像通話，透過安裝喺網頁內嘅軟件就可使用。

■佢擺明挑戰Skype地位，有Webcam就玩得。

第3罪
Sparks抄Forum！網料Share

網上討論區有唔同內容嘅板塊，唔少熱心網民仲會不斷剪相關內容嘅新聞。Google+嘅新功能Sparks就索性做中介角色，預設已經有時裝、電影、足球等資訊話題，由網上收集後再整理好，就好似剪報一樣，睇完仲可以Share返出嚟俾朋友再睇。另外，只要喺Sparks加入個人喜好嘅Keyword，又或者於搜尋列輸入關鍵字眼，以後就可以好似RSS咁訂閱新聞。

■Sparks收集網上唔同Gossip資訊，方便一次過瀏覽。

第4罪
Stream抄twitter！任噏訊息牆

twitter嘅成功係因為用家可以簡單分享自己嘅想法，仲要有個一面訊息牆俾人清楚睇晒自己分享過嘅說話。唔止facebook要向佢借鏡，今次Google+都玩埋一份。訊息串（Stream）就好似twitter嘅Tweet，可以一次睇晒自己同朋友嘅最近狀況。另外，Stream內寫嘅訊息不能多過140字，完成後可即時貼相、分享視像、連結及位置，仲有埋「+1」功能，可以為好Post說讚！

■Stream介面有幾分似twitter同facebook。

■用手機自拍完，透過行動版Google+就能夠貼上Stream。

第5罪
Huddle抄WhatsApp！群Send訊息

約朋友食飯，最煩就係逐個朋友傳訊息，左Send右Send真係麻煩到極。自從WhatsApp推出GroupChat之後，問題就解決晒，不過有10個人頭限制，一隊足球隊都裝唔落啦！Google+手機版就有一個疑似功能Huddle，暫時只有Android手機用到，可以集體GroupChat同傳短訊，配合埋Circles使用仲可以圍內吹水，直接Add個社交圈就搞妥。

■比起WhatsApp，免費嘅Google+Huddle更有優勢。

■唔止可以Groupchat，仲可以群傳訊息。