鄭兆良心目中的完美晚裝，是令顧客穿上身漂亮動人，自然產生的快樂指數比創意來得重要。18年的設計生涯，他珍藏大量天書，裏面都是前人大師的偉大設計及大自然創造的自然瑰麗，這些就是令人產生感恩及快樂指數的動力來源，也是他私藏的瑰寶參考。 撰文：嚴祖莉
鄭兆良（Barney）是香港擲地有聲的晚裝設計師，他坦承其設計風格從沒有跳蹦蹦青春期，一開始就決定做elegant、timeless的設計，他說：「好多人同我講，最賣就係少女嘢，佢哋貪新鮮，追新款，我會諗：咁40、50歲嗰批邊個理？另一樣會賣嘅係sexy，但亦唔係我想做嘅嘢，我想做嘅係正面、長線，或者我仲係oldschoolthinking，我做晚裝，無非都係想人靚，我會幫人隱惡揚善，要着嘅人睇起嚟高啲瘦啲靚啲。」
設計着重美化
Barney對設計要求是：「100分嚟計，創意只值10分，我會畀60分喺剪裁、車工、細節上面，商業價值佔10分，有20分我會擺落快樂指數上面，簡單嚟講係要令我啲客開心，佢哋着上身，感覺好，有自信有光芒呢樣好重要。」會怎麼形容自己的設計？他說：「禾稈冚珍珠！唔係煞有介事，睇起嚟好輕鬆自在，但係細心睇，翻兩翻，你會發現工同料都係有水準。」
從93年成為時裝設計師至今，Barney自評成績OK：「唔算乜嘢成功大生意，唔係人哋睇咁風光，家studio養住15個人，有段時間好辛苦，不過金融海嘯都死唔去，家有內地市場，仲更加好。」Barney沒有讀過時裝設計，做設計師最初的動力動機只是：「想證明畀人睇，香港唔係淨係得copy同埋渣料，香港都有有水準嘅設計，呢樣嘢算達到咗。」
賣美成衣遇挫
但是18年來，Barney並不是沒有挫折的，他說：「我以前一直都淨係我、我、我，唔係唔好，但焦點錯咗，設計又係我，QC又係我，追數又係我，慢慢就burnout，同埋我太堅持quality，後來先發現特別係做成衣（ready-to-wear），行業內大把人冇呢份堅持，仲要係外國人！」
做生意成功不易，Barney說：「一盤成功嘅生意等如一個金三角，自己只係一點，仲有兩點就係睇全盤數嘅人同埋productionpartner，我爸爸成日同我講：『你其實要搵一個猶太人返嚟幫你。』就係因為我曾經太快發展ready-to-wear，落單嘅仲係美國大大百貨公司Bergdorfgoodman。有年我去紐約，順便就去Bergdorf探吓自己嘅衫，嘩！成衣連晚裝咁多貨嘅？又mark貴咁多，但係啲quality…，我搵返佢嚟問，答案係：『同咗你講reorder，你唔做，我咪搵第二個做囉。』即係抄款？咁都得？原來外國人先至唔堅持quality！」
放棄自我觀念
Barney續說：「呢件事就證明咗得我我我一個人係唔work，結果就俾人呃囉，因為咁停咗唔做ready-to-wear。度身訂做有得對返人，簡單啲，自己都enjoy好多。如果我搵到另外嗰兩點同我連成一個三角形，或者會考慮做返ready-to-wear，家心態同價值觀改變好多，唔會淨係我我我，雖然我一個人能力係有限，就用我設計上面嘅能力，做一啲好事囉，所以我近年好into做慈善幫人。」最後以過來人身份會如何勸勉新一代想入行的年輕人？他說：「唔好只顧我、我、我囉，最好去大公司做咗先，享受吓人哋嘅資源，我就冇呢個經歷啦！哈哈！」
人物誌：名媛設計師得客心
鄭兆良，有「名媛設計師」稱號，沒念過時裝設計的他，在加拿大UniversityofWaterlooFineArt學士畢業。93年在香港青年設計師比賽得獎後，正式投身時裝設計師行列，他的婚紗晚裝深得名媛明星歡心，客戶數之不盡，包括有鞏俐、周凱旋、楊紫瓊、楊敏德、雷林靜怡、賭王媳婦羅秀茵等等。同時也為大集團如信興（Panasonic）、ifc及太古（Swire）設計制服。
尊重歷史 開啟創作
愛時裝做時裝的，同時也愛書，在鄭兆良工作室內存放了多本時裝典籍，他坦言「邊得嚟咁多創意」，反而珍惜無敵大自然景觀生物及前人大師的設計，因為這些正是他的瑰寶參考。他說：「呢啲係自然，係歷史，冇以前就冇將來，所以要尊重歷史，對大自然感恩，呢啲先至唔過時，設計師再運用自己嘅聰明智慧，唔好話新，或者話係特別啲嘅嘢出嚟。」
１）《LivingJewels》
「呢啲顏色組合豐富嘅昆蟲相，啟發我對組合顏色嘅和諧或者刺激，套用喺一條裙或者髮型化妝都得，好多人一見到昆蟲就話核突要踩死佢，但係細心睇，其實不知幾有欣賞價值，靚過好多心地唔好嘅人就真。」
２）《TheArtofHauteCouture》
「HauteCouture強調嘅人手一針一線，當中投入嘅精密心機，幾乎已經係絕迹，我哋做晚裝，好講求釘工細節等等finishing，呢啲相唔只係睇到啲刺繡有幾無瑕，啲石有幾閃，仲有係注滿loveoflabour。」
３）《Flora》
「呢啲相，對構思一件晚裝嘅shape，texture甚至details都好有用，英國NaturalHistoryMuseum都將呢本書當係重頭典籍，因為大自然嘅美妙偉大就係一切都係自然但係又款款唔同嘅精采，唔係點解naturalbeauty係最無敵？」
４）《BalenciagaandhisLegend》
「係我最欣賞嘅其中一個設計天才，喺當時咁反傳統，家睇又永遠classic，唔過時。」
５）《Vionnet》
「另一個祖師奶奶級人馬，點解我成日講要尊重歷史？因為佢哋開創咗一啲新嘅嘢，後人得到啟發，先可以善用沿用，好似JohnGalliano就係好鍾意仿效Vionnet嘅無敵draping。」
６）《VOGUE：Historyof20thCentryFashion》
「好多新一代想入行，我都會問佢哋知唔知20年代風格係點？ArtDeco風格有乜特色，佢哋都話：『我唔知呢啲，但係我有創意！』咁就死啦，唔夠啦，睇返過去先至有將來，有forward，睇返每一個年代嘅時裝演變對設計唔只有幫助，直頭係must！」
