提起何超儀，大家還想起《何家淑女》，化名何超，卻變成了怒火中燒的Rock女。近年何超拍戲演「上唔到車中女」，瘋狂殺戮的女狂徒，今勻出四曲EP，向七十年代Punk、HardRock取經，嘈到坼天。英倫人玩Punk都要WorkingClass（工人）階級出身，你父親是何鴻燊，含鑽石匙出世，憤怒何來？仲有乜怨先？
記者：何兆彬
攝影：伍慶泉、陳陶鈞
嗌出來發洩咗怨氣
「怨o架！就係因為人人都咁諗，所以怨囉。不過以前我未聽Rock，我以前聽Pop聽Jazz聽House，唔識宣洩，係後來受陳子聰、LMF影響，開始聽Rock，咦，原來可以咁表達o架喎，正！認識了Kevin（鼓手），記得有一次在佢Band房聽Pantera，嘩，原來可以去咁盡，開始有人話其實我都可以玩Rock，咁就試吓啦。嗌咗出來，發洩咗怨氣呢幾年就好啲囉，係疏肝喎！」何超說。有道理，世間事可以用財富解決的的確好多，但不能用錢銀解決的更多，唔通李首富有乜事唔開心又話過你知咩！佢又唔夾Band。
認識LMF，以至玩埋一齊，是這十來年的事，約03-04年，何超開始與LMF的鼓手Kevin組Band。Kevin是何超樂隊Josie&theUniBoys的團長，他為全職音樂人，從前夾LMF，之後有KingLyChee，近年再有Hardpack，又替各大演唱會、《勁歌金曲》等打鼓，UniBoys的成員如結他手Don、低音結他手基仔都由他羅致，何超笑說：「Kevin就像淫媒一樣！」基仔：「之前大家不認識，但我聽過Kevin個大名，有日佢打來搵我彈《勁歌》，我當然話好，之後仲入埋這隊Band。」Kevin身份多多，點分配？「我身兼幾職，就看自己時間分配囉。但其實通常是Josie就我哋時間，所以佢唔似老闆，反而我哋似老闆多啲。」
不是老闆搖滾
談到老闆，對！球迷討厭艾巴莫域治式的「老闆足球」，記者討厭「老闆報章」，樂迷也討厭「老闆音樂」，即係畀錢的嗰個話事。何超儀出身富貴，難免有人會有偏見，認為她玩的是老闆搖滾，Kevin卻說絕對不是：「這隊Band與我其他Band不同，以前我是有人說：『喂，荔枝王要個鼓佬喎！』我係先夾Band後做朋友，但與Josie不同，大家本身是朋友，平日玩都會見面，所以是先朋友後夾Band，而且她也給我們好大自由。」結他手Don：「談到這裏我必須要講，就是我以前夾過其他Band，但係玩玩吓，就會有人出聲，話這裏會不會太嘈太過火了，但係Josie從來不會，我哋話不如去盡啲，她都會讓我們玩，絕不會干擾。」Kevin：「因為我同時夾幾隊，有時反而在UniBoys要收番啲，盡量不要太KingLyChee太Hardpack。這些歌有點是特別為Josie度身訂做似的。」有趣的是，話要去到盡，在台上又玩出一手辛辣、Dirty結他聲音的Don，正職其實是一名教師！懂小量廣東話，平日以英語交談的他說：「我日頭在Pre-primarySchool（類似幼稚園）教書，教幾科，也有教音樂課的。」幼稚園當然不能彈狠辣電結他，Don就玩玩木結他，也彈點琴，打打鼓。想不到吧！
托陳冠希鴻福囉！
「因為這唱片想尋回Woodstock那種氣氛，有好大的結他Solo，同時又好Spiritual。主題曲《天眼通》談的是有些人自以為是，以為自己乜都知！我引以為傲是有份寫了兩句歌詞：『我內衣是粉紅，你怎麼知道！』碟名叫《天眼》，Prodip（阿庭）又替我們構思了一些好Spiritual的概念，如天眼能駁通天地。」Josie&theUniBoys的創作流程大致如下，Josie：「Kevin會先起鼓，然後大家Jam歌。」Kevin：「Jam歌時，再鬥快找到Melody出來。邊個先玩到一段Melody，邊個就負責返去寫埋隻歌。」Josie：「歌詞我有份寫，陳子聰又寫了幾句，寫唔晒我又找了農夫C君幫手，又找了Mr.的Dash，因為我喜歡他的《黑色狂迷》，他的詞好生活化好自然。」這隊Band以前未有團名，兩年前因為Josie的大仔（愛犬）Uni病重，Kevin就建議取其名字作團名，未幾Uni逝世。團名來自西施狗？唔夠Rock喎！Josie：「佢雖然係一隻西施狗，但佢係一隻好Rock、好孤僻的西施狗！」
何超以前做碟都會唱番首K歌，商業計算十足，今次四首都砰砰聲HardRock，絕不留手，她笑說：「今次托陳冠希鴻福囉！（按：新EP由陳冠希公司CMD發行）可能以前都係對自己唔夠信心，唱隻K歌就好似買個保險咁，覺得唔係咁就賣唔到，其實我唔係對自己無信心，係對電台呀電視無信心，因為會有人同我講：『喂，你隻隻歌咁掯，畀隻情歌我來播吓啦！』」到了這一次，她選擇不妥協，也多得陳冠希全力支持。
鍾意哪些樂隊?
問Josie鍾意乜樂隊，她說：「有幾隊，YeahYeahYeahs、TheKills、Juliette&theLicks，仲有Ramones！」
夾Band玩到老！
Edison都聽Rock？「認識陳冠希好多年了，以前大家在同一間經理人公司，講過話一齊搞公司，到幾年前他組成CMD，大家又再提過合作搞音樂，到這次終於成事了。（他有何要求？）他的要求就大了，起初我說出碟，陳冠希說：『出EP？四隻歌？好，咁我要四隻都係HitSong，四隻歌都要Plug得起！』到做了出來，他也很喜歡呀。」談到與唱片公司合作，就算是何超儀都要吐吐苦水，「錄好晒歌，有唱片公司同我講，話你封面相個妝五顏六色，如果你攞這張相做封面，台灣嗰邊會賣唔到喎！」據記者所知，台灣社會並不如斯保守喎，事實可是如此？「梗係唔係啦，點會因為一個唱片封套影響到賣唔到！最後我無理佢，照用那個封面。」咁無自由，為何不自己搞？你不是也成立了自己的電影公司？「唱片業我們真的沒有那種Expertise。夾Band出唱片是心願，我希望能玩到老！」
雖然去到盡，但商業上還是有計算，EP四首歌，一半廣東，一半國語，「想做碟，但如果只係香港市場係咪太細呢？所以各做一半。台灣方面，去年的『貢寮音樂節』我們已表演過一次。至於大陸，在內地發行唱片是一件十分困難的事，我們正嘗試做，希望能往大陸表演，兩岸三地同時發展。」
