55歲的莊友衡，與莊友堅的樣貌如餅印一樣，一望而知是兩兄弟，最大分別可能是談吐方式，莊友堅說話粗豪，莊友衡較溫文，有耐性，臉上不時掛着微笑，不知他背景的，可能以為他是大學教授，這一點跟他來自書香世家，父母親戚均是上海聖約翰大學畢業生不無關係。
性格不同 「無咩一齊做嘢」
莊友衡坦言，跟莊友堅的性格不接近，「我比較個人主義，佢鍾意同好多人一齊講嘢、飲嘢。佢圈子大好多，我喺香港得十幾個朋友，應酬都少」。而且，兩人做事作風南轅北轍，「佢做嘢aggressive（進取）好多，專長於財技、企業財務，我就多啲技術性同學術性」。莊友堅喜歡炒股賺錢，莊友衡則不好此道，指自己投資不多，買股票屬於中期投資，甚至會買基金！
最搞鬼是，莊友堅曾經講過，與莊友衡拍住上搵食，「我負責發號施令，莊友衡則守住啲錢」，有事再互相提點。問到兩兄弟實際如何分工，莊友衡有意無意劃清界線，強調二人「無咩一齊做嘢」，指「佢曾經係中南證券揸弗人，我哋有用佢嘅服務……好多項目經佢介紹畀我哋，啱聽就會向個董事會講」，只此而已。
莊友衡又大爆，一星期只會因為跟86歲的母親飯敍，才見莊友堅一次。提起莊老太，上月初德發集團（928）公佈重組計劃，引入莊老太黃民權為投資者，通告披露莊老太活躍於股市逾30年，投資組合總值1億元，「以佢咁嘅年紀，家仲每日睇財經新聞，有自己嘅想法」。得到母親真傳，難怪兩位兒子均在金融界吃得開。