政府大幅削減內地孕婦產子名額造成惡性循環，內地孕婦衝入急症室產子，私院加價令本地媽媽被迫回流公院，產科服務大亂，受害的仍是本地媽媽。有本地孕婦被內地孕婦衝急症室嚇得情緒失控；有孕婦在三號風球下到私家醫院預約產子，有孕婦更乾脆到外國產子。 記者：陳沛冰
蔡太預產期是明年1月初，她證實懷孕四至五周，「未照到個胎有冇心跳」，便急不及待到威爾斯親王醫院預約產子。「嗰時政府啱啱宣佈（公立醫院）落閘唔收內地孕婦，以為會安心啲，床位唔會咁緊迫，人手唔會咁緊張，唔使同內地孕婦爭；反而私家醫院好多內地人，好似街市」。
憂產房難預人手
但其後越來越多港人內地妻子聲言，由於未能預約公院產子，會衝急症室產子；網上討論區有本地媽媽指懷孕五至六周，已不能預約私家醫院。「一見到就好心噏，眼濕濕，好想喊，情緒會好波動」。
蔡太表示，早前當她在公司忙碌地工作，突然看到新聞指有港人內地妻子示威及跪在馬路，攔截食物及衞生局局長周一嶽的座駕，「啲眼淚即刻標出嚟，覺得好困擾；最令我激動係佢哋話到時會衝入急症室，仲叫埋其他人衝，預計唔到佢哋幾多人，幾時會衝。佢哋衝急症室最終都係上產房，驚自己生時產房會好爆，醫療人員都預算唔到人手，最終影響到已經預約要生仔嘅孕婦」。
她聽聞因公院有太多內地孕婦，本地孕婦要「瞓走廊」，「好擔心病房會好爆，要瞓走廊，要加床，忽然間擔心唔知會點」。
「政府冇希望前景」
本地媽媽需要「鬥快」預約公院，擔心遲了預約很多產前檢查會爆滿。像她這麼早預約，威院只能安排她懷孕24周才進行首次產前檢查，其間她惟有到私家醫生接受產檢；每次最少500元，若需化驗、檢查及服藥更需900元，「負擔到，但係係幾大嘅開支；本來可以有嘅福利，家少咗」。
70後的蔡太坦言，先後經歷亞洲金融風暴及沙士疫潮，近一、兩年生活穩定下來，才與丈夫決定生兒育女。「本來生仔好開心，家比想像中煩多好多嘢。特首叫人生三個，生一個都好多問題衝住嚟，唔敢生三個」。
蔡太指並非歧視港人內地妻，但認為所有人應循合法途徑來港。「逾期居留擺明係犯法，點解仲要包庇佢哋，咁多議員幫，我哋反而冇人幫，心態好唔平衡」。她說，不會指望政府幫到本地媽媽，「政府係冇希望，冇前景。雖然一國兩制，但係王光亞講一句就復建居屋，以前社會咁多聲音，政府都冇反應。除非王光亞叫內地人唔好嚟香港生仔，如果唔係香港人都係自求多福」。
配額制明顯無效
06年站出來為本地孕婦爭取權益的劉太表示，當年本地孕婦抗爭後，政府實施的公院內地孕婦收費及配額制明顯無效，現時問題越演越烈，「餅都唔夠分，政府仲放咁多人入嚟」。
劉太認為政府應加強投放資源在產科及兒科服務。網上討論區不少本地孕婦聲言要再次遊行抗爭，她指若有需要會協助。
本地孕婦預約產子注意事項
1.若想預約私家醫院床位，證實懷孕後要盡快預約
2.若想等待唐氏綜合症篩查及結構性超聲波檢查結果，屆時私院應已爆滿，只可預約公院
3.孕婦預約公院產子時應說明病歷，尤其是高危孕婦及之前一胎有問題，以便公院盡早安排產檢
4.若公院安排的產檢較遲，應自行預約私家醫生做檢查
資料來源：婦產科專科醫生靳嘉仁