衞志豪復牌　不再輕狂

人要經過挫折才懂得珍惜！有線娛樂台主播衞志豪一向視車如命，去年五月卻因醉駕被法庭判停牌一年，公司更罰他停工一個月閉門反思。剛復牌的他坦言停牌無車的日子很難過，會好好珍惜今次機會以後生性做人，不敢重蹈覆轍，他更以過來人身份警惕大家切勿酒後駕駛，果然見過鬼都怕黑。

記者：錢綽芝
攝影：林栢鈞

六月上旬，衞志豪在自己的微博中透露收到運輸署通知快將復牌，於是立刻嘗試聯絡他做訪問。點知呢頭send出，嗰頭就爽快應承。起初估計一向喜歡跑車的他會要求試駕跑車止癮，因為他兩年前替車版做訪問時，都係試一部蓮花LotusEliseSC跑車，但想不到今次他竟然自己提出話想試試平治，最好仲要係E-Class型號。自去年醉駕事件發生後，他直言令身邊好多朋友及同事擔心，人都變得成熟了，追求的已不同，而E-Class一直在他心目中是型格與穩重兼備的房車。

■兩年前愛有型，一定要試跑車。

新E仔不再薯嘜

試車當日，前往將軍澳取車途中，他已不停追問今日試的車是甚麼顏色？甚麼型號？又話相士同佢講今年銀色車最利他。當抵達停車場後，眼前就是一部銀灰色的E300Avantgarde，他就像一個小朋友見到自己心愛的玩具一樣，立刻跳入車廂周圍摸，逐一了解各操控按鈕。佢對E-Class特別情有獨鍾原來有前因：「多年前曾經揸過朋友部舊款E320，已經覺得好Grand好靚，自此就對佢念念不忘，但始終覺得自己年紀尚輕，暫時都係選擇番young少少嘅車來襯番自己。不過新一代E-Class型咗好多，外形唔同以前嘅四眼仔薯嘜look，大膽嘅菱形四頭燈設計，襯埋14粒LED日間行車燈，個樣惡咗好多。」

■車頭時尚的V形輪廓，富有房車少見的動感。

低轉強扭力帶來推背感

打開頭冚就見到一副3公升V6引擎，最大馬力有231匹，之前一晚已做定功課的他在網上找到不少資料，他更滔滔不絕反向我介紹這款車的7G-Tronic七前速自動排檔撥桿有幾好。他亦大讚置於方向盤右後側的排檔設計，可增強駕駛時的便利，想轉波，直接使用方向盤的換檔撥片便可，這才是真正駕駛樂趣。而真皮座椅配襯的黑梣木裝飾內櫳，加埋雙玻璃天窗，豪華得來又有品味。他小試了一段環保大道直出將軍澳一帶，亦忍不住大讚：「上斜、落斜同入彎表現絕對攞滿分，踩深啲油門更有推背感覺，估唔到呢副V6引擎喺低轉都可以發出咁強大扭力。而七前速波箱轉波雖然頻密，但乘客一定感受唔到，只有揸嗰個先感受到極輕微嘅震動。論外形，車形夠硬朗；論設備，要有的都有齊，最緊要係有一對左右燕子尾排氣喉添辣點睛。」今次衞志豪試車完全沒有開快車，他打趣話因為環保大道太多偵測相機及經常有偷番薯的捉快車，轉頭才一臉正經話：「其實揸車真係唔應該開咁快！」停牌一年果然令佢上了人生另一課。