問我邊種海鮮最正？我一定話蝦！蝦子麪你食過未？蝦米蒸水蛋你喫過未？嗰份鮮味，由佢出世一刻已經注定。白灼雖則最原汁原味，但食得多好寡。唔想咁寡，燒啦，燒大頭蝦勁香脆，正在蝦膏多到可以用羮𢳂，有排你啜呀。
記者：朱崇德
攝影：陳陶鈞、陳盛臣
Model：AnnieG@GME
大頭蝦膏味濃
大頭蝦，蝦頭含膏量極豐富，記得啜埋佢，唔好嘥。
旺角一街都係日本串燒放題，但未必間間都好似「燒魂屋」，肯揼本提供貴價用料，識佢，係從一口牛開始，用真安格斯牛，牛味十足嗰隻！甚麼舖頭聲稱一個價喫盡過百款至堅至靚美食，但統統得個講字，「燒魂屋」夠膽俾你睇埋產地來源證，有信心好多囉。
最近餐廳新推出幾款自點菜式，都係玩靚蝦。香芒火龍卷係我推介，飯糰外加惹味蟹子增加鮮嫩口感，再將牛油果變成鮮芒果，甜甜酸酸夏日感重好多。魔頭芝士燒，貌似一般芝士焗蝦，感覺幾Heavy，大廚文師傅話：「無計，十吋長巨型大頭蝦，蝦頭藏咗差唔多成湯匙蝦膏，芝士唔落重手啲都夾佢唔起。」我試過，入口一嘴甘，濃味到錯覺以為食緊大閘蟹。
花竹蝦啱做刺身
花竹蝦，特點超鮮甜，燒有啲嘥，做刺身好過。
好多放題店都話自己用花竹蝦，講真，蝦燒熟咗就隻隻一樣色，好難認，文師傅話：「做刺身冷食，等大家認清蝦身花紋啦。」夾檸檬片上碟，唔係叫你食埋佢，一來美觀啲，二來有助肉質更提鮮，蝦肉鮮甜彈牙，點埋個野山椒配魚醋，真係惹味到飛天。
喜歡熟食者，可一試花天使鮮果沙律，沙律菜配芒果，夏日清爽口感滿瀉，蝦肉極鮮甜，再加用甘笋、穀物醋同西芹打成嘅自家醬汁，鮮上加鮮。
貴族青龍蒸蛋白
龍蝦，可以話蝦中貴族！「我揀斤零重本地青龍，嗰種鮮嫩彈牙嘅肥美口感，係呢個斤數獨有。」三十五年老師傅周鎮錦果然眼光獨到，
上「帝京軒」擦龍蝦，主要係相信行政總廚周師傅眼光，「以蝦類嚟講，龍蝦叫價最高，波士頓龍蝦肉質軟又散，東南亞大龍係就係多肉呀，不過質感木木獨獨，蝦味唔夠濃郁，都係本地青龍好味啲。」五星大酒店做中菜，真係有Heart好多，餐廳有個專用蝦池，所有蝦隻全部鮮蹦活跳。粵菜做法，好多人話萬變不離其宗，喺周師傅手底下，我試咗個酒香芙蓉龍蝦球，菜式名字靚，造型仲靚，上枱如一件雕塑，一見蝦身活潑紋理，就知用本地龍蝦上等貨，一羮，粉滑蝦球連住薄薄一層蒸蛋白，未入口，二十五年陳年花雕酒香，已經引得我口水流，嫩滑蛋白混彈牙龍蝦球，會令人好唔小心一啖吞落肚，其實我仲想多兩嘢o架！
再來有蒜油焗開邊龍蝦，上枱，一，你又會以為係一般芝士焗乜焗物菜式，不過對唔住，估錯晒。封面嘅焗汁，係用沙律醬、脆炸煙肉、洋葱粒同雜菌混合而成，沙律醬有助鎖死龍蝦肉汁，其他配料勝在惹味兼增加口感，又係好味到停唔到口。
螳螂蝦彈牙索油
上等螳螂蝦，肉質好彈牙，特點好索油，一隻八両Size最正。
同螳螂蝦一向無乜兩嘴，無他，硬係覺得肉質霉霉散散，有啲敬而遠之Feel。不過今次唔同，周師傅話：「東南亞飛機貨，優點係肉質超彈牙！」即係話我以前食親嘅都係次貨囉。椒鹽做法，好多地方曉玩，「帝京軒」加多啲蒜茸、胡椒同五香粉，所以入口惹味好多，螳螂蝦好索油，家陣難得地炒得好乾身，周師傅：「臨上枱猛火脫油好重要，方法好多人都知，不過好多人都做唔到。」
唔食得辣，仲有款乾燒原隻螳螂蝦，醬汁用茄汁、葱花、陳醋搭薑米打成，八両一隻螳螂蝦Size最適中，猛火炸到脆，超正。
中蝦蝦味剛剛好
何解大蝦、小蝦唔入流，中蝦先上Top5？周師傅：「蝦太大隻，唔夠爽口；太細隻又嫌唔夠肉地，中蝦喺兩者之間，蝦味濃又夠彈牙！」都咪話唔講究！
乾煎、豉油皇等等煮法太普通，今日試金銀蒜翠玉杯蒸中蝦！翠玉瓜挖成酒杯狀雕埋花，裝住隻扭晒麻花嘅中蝦，賣相別致，爐火一蒸，蝦汁一滴不剩流晒入瓜肉，再撞蒸魚豉油，正是蝦鮮瓜更鮮。如果都係喜歡香口嘢，推介山楂脆炸鳳尾中蝦，睇樣有啲似茄汁蝦碌，家陣用鮮山楂配糖醋茄汁，甜中帶少少酸，非常開胃。
a.帝京軒（26226161）
地址：太子道西193號帝京酒店3樓
b.燒魂屋（29888441）
地址：紅磡庇利街34-36A地下