呢日上網入銀行戶口查閱賬目，點知記錯咗密碼，無法子登入，為之冇晒癮。銀行、信用卡等等都有密碼，我們曾「被警告」，不可將密碼寫低入記事簿，或任何文字記錄，又唔好以生日（例如20110704）做密碼，更唔好用一啲如8888、3333之類，於是自己挖空心思諗到嘅密碼，如果唔係日日用，好快就唔記得咗，左丁山呢日就自吃苦果。唔記得密碼，有排煩o架，偏偏自己就永遠唔記得密碼，死火了。
不過密碼不慎洩密，又或者俾人偵破，仲更加煩死人。校友船務A就係一個活生生例子。三個禮拜前，突然收到佢嘅gmail電郵，英文原意嘅廣東話繙譯大意就係：「我係AA，正在蘇格蘭高原行山，被賊人攔途截劫，所有證件現金、信用卡冇晒，信用卡又要一個星期後先至收到替補，請你幫幫忙，急滙若干英鎊到我嘅滙豐戶口……返到嚟立即還番俾你！」
咁論盡，好慘啫，但係收到電郵前一個星期，先至同船務A在占美廚房食古典阿黃炒飯，佢都冇話過會去蘇格蘭行山嘅噃！一想不妙，立即打電話去佢嘅移動電話，電話飛咗番佢公司，秘書接聽，秘書小姐話：「左先生，唔好意思，你收到A老闆救急電郵呀？係假o架，千祈唔好理，今朝收到百幾個佢嘅朋友電話，都係問呢件事，其實係佢嘅gmail俾黑客入侵，俾黑客控制咗兼攞晒你地嘅電郵地址，你都要小心呀！」
真係無妄之災，船務A為之頭都大晒，呢個時候就會想到密碼之重要，千祈唔好俾人偷到。
「華爾街日報」（六月廿九日）教我地用一啲易記但難寫，只有自己知嘅密碼，例如係wittyapple71，好易記，但寫就係「w1tty@pPle71」，將i寫成1，a寫成@，一個P寫成大階，再加一個隨意號碼（不是生日之年），咁就會令到黑客好難偵破，船務A不妨參考吓。專家話個個戶口都要用唔同密碼，以及在電腦裝置一啲「反間諜軟件」。總之，科技愈先進，我地愈難保留秘密，而為咗保留秘密，傷盡腦筋，之所以拉登唔用手機，唔用網絡也。