嫁，意思是給女人一個家。41歲的莫文蔚（Karen）將於10月嫁給德國籍初戀男友Johannes。敗犬女王莫文蔚，在台灣金曲獎最佳國語女歌手獎的頒獎台上，以大贏家姿態吶喊歡呼：「我該結婚了！」，這完全是KarenMokstyle，今次擺明晒命，不過大家受落。在適當時候，揀對人，做對事，幸福可以是必然的，莫文蔚祝福所有剩女：「希望大家幸福，連我都做得到，誰都做得到！」姊妹們把握時機，捉緊緣份，過一個精采的人生！ 撰文：楊潔雯
莫文蔚（Karen）23歲入行，18年來拚命為自己的愛情和工作付出淚與汗。一直醉心音樂的她近年自資出碟，再次博得台灣歌后榮耀，今日成績有目共睹。歲月催人，電影人捱更抵夜，音樂人通宵達旦，41歲的Karen，眼角明顯多了幾條歲月交織而成的魚尾紋，看上去，有點累了！不過，有愛情滋潤的女人，總是漂亮的，一提到未婚夫Johannes，Karen總是「哈」個不停，此刻，一個幸福滿瀉的新娘子就在眼前。
婚後歐港兩邊飛
Karen和Johannes17歲拍拖和分手，之後你有你的生活，我繼續我的忙碌。20年後，一對初戀情人在一個偶然機會再相遇相戀，拍拖一年多，已經談婚論嫁，Karen說：「大家都係追求呢樣嘢，到佢向我求婚，我咪應承囉！」
一個可以讓Karen附託終身的人，會是一個怎樣的人？Karen說：「佢會係一個可以幫我calmdown嘅人，我會係火爆嗰個，一凹一凸，佢好多方面都思想成熟，好有條理，而且係一個好實在，實際嘅人，唔係花弗，唔係吹水唔抹嘴嘅人，我覺得我可以信任佢，倚靠佢。」的而且確，女人每個階段，需要的，都不一樣，Karen現在要的，應該是一個成熟穩重，願意給她一個家的男人。
性格自我、愛自由的Karen，婚後依然故我，沒有打算做全職少奶奶，她說：「當然我唔會再擺晒100%去做嘢，既然結婚，我生活嘅另一面想豐富啲，當我遇到好嘅電影，咪拍囉！寫到好歌我咪出碟囉！婚後我大部份時間會喺歐洲，到時香港歐洲兩邊走。」
童話式的愛情，背後一樣有附帶條件，Karen未婚夫20多歲開始第一段婚姻，育有3子女，大女兒已經17歲，Karen說：「佢哋都好大喇！係大人，最細嗰個都十幾歲，好易溝通，可以當朋友，幾得意呀！無端端多幾個friend。家世界唔一樣，同埋都好多呢啲情況，佢哋身邊朋友都好可能離過婚，家年代唔同，呢件唔係乜嘢大不了嘅事。」
助子女排難解憂
新潮繼母要融入家中，要打開互信之門，自然要有共同話題，蝴蝶夫人解答少女心事，最好不過，Karen說：「哈哈，係呀！大女開始拍拖，佢都會問我呢方面嘅嘢，而且佢哋真係好好奇，對於初戀情人呢樣嘢好奇，跟住我又係藝人明星，對我仲特別好奇，所以大家都幾多嘢傾。」至於生育問題，Karen說：「我冇諗，會順其自然，有咪生，冇都冇所謂，唔使刻意安排，我唔一定要生到為止。」
感激兩個Stephen
莫文蔚高傲、自恃，交朋結友，標準很高，揀男友都不例外，命運的安排，莫文蔚生命中的兩位男友Stephen：周星馳和馮德倫，在她心目中，都是與眾不同。自Karen拍周星馳的電影開始，緋聞一直傳個不停，而這段情無聲無息地開始，亦毫無迹象的消失，所以Karen至今仍然以斷片為由，拒絕回答跟周星馳的地下情史，但從莫文蔚的歌如《他不愛我》可找到蛛絲馬迹。
星爺與眾不同
雖然如此，Karen對周星馳仍然有很高評價：「無可厚非，事業上嘅成就佢係一個好叻，尤其作為一個表演者、演員，佢有佢與眾不同，獨一無二嘅地方。」亦師亦友，周星馳當年全方位照顧莫文蔚，度身定做《食神》嚇人刀疤齙牙雞姐角色，讓她再一次突破自己，Karen說：「我初出道拍佢幾部戲，絕對係好好，當年做火雞一角，我飯應，我性格咁鍾意突出，呢個角色，嘩，正呀！所以我真係好開心，因為到家都仲有人講緊呢部戲。」
愛馮德倫靚仔
馮德倫和Karen拍拖9年，07年莫文蔚演唱會公告情變，原因不明。相處多時，Karen眼中的馮德倫有甚麼過人之處？她不假思索，劈頭第一句說：「佢咁靚仔，一句講晒喇！」嚇了一跳，這個答案好合理，但是膚淺。戲言之後，Karen再補充說明兩句，然後做了一個總結：「其實佢有好多talent，只係佢唔係一個咁鍾意showoff嘅人，我覺得喺每段relationship都會得到唔同嘅嘢，係一個過程，唔workout分手，都相處咁多年，都會得到好多嘢，所以我都會感謝佢哋呀！」
開明父母訓練獨立
莫爸爸講過不喜歡周星馳，莫媽媽從來都不會主動提起馮德倫，但是兩老對未來老外女婿Johannes卻又讚不絕口。莫媽媽口中的乘龍快婿好乖，好尊重長輩，有紋路，家庭非常好，是PhD，父母是數學家，哥哥都是律師，Karen不負所望，找對了一道相稱的門，莫爸媽終於放下心頭大石。
「唔會強迫我哋」
Karen今日的成就，是父母的教導，Karen認為莫爸媽的教育理念是宇宙最強，她說：「傳統得嚟又好開放，鼓勵我哋追求自己理想，又唔會強迫我哋，所以訓練到我哋好識諗嘢。」在適當時候，做了適當選擇，莫爸媽的家教，在適當時候發揮作用，Karen最終揀到個如意郎君，她說：「最緊要講到尾都係我開心，揀邊個都好，最緊要係錫我。」
攝影：陳志嵐
頭髮：DerrickNgofP.O.Phairdressing
化妝：KerryWong
場地提供：港麗酒店
服裝：MaxMara、tabla