出道已九年的傅穎（Theresa）在青春片《熱浪球愛戰》中與o靚模出身的周秀娜和JessicaC.比演技拼身材，上圍輸蝕的Theresa，惟有用孖辮look晒cutie，力討宅男歡心，面對影圈搶手貨娜姐這股後浪，前輩Theresa即自爆「維新論」怪招迎戰，她表示年年當自己新人以防被淘汰。 撰文：比華利
上映日期：7月7日
周秀娜、JessicaC.和傅穎去年書展不約而同推出噴血寫真，銷量早已分高下，娜姐大熱勝出，三女今夏不再單打獨鬥，反而聯成一線，齊齊倒奶打沙灘排球，在電影《熱浪球愛戰》中孭飛晒身材比球技。過檔星皓快兩年的Theresa星途未見起色，新戲面對娜姐和JC兩位潛力無限的索爆後輩，她直認要加把勁，慎防被後浪吞噬，卻冷不防娜姐放暗箭大爆Theresa開工期間狂NG瘀事。
傅穎：當自己新人
近年電影圈掀起以青春片為題材，盛夏特產樣靚身材正的o靚模正是女主角的首選，環顧《熱》片的女角，論資排輩，今年九月便踏入27歲的Theresa已算資歷較深的前輩，她早於02年便憑Cookies成員之名闖樂壇，踏上玉女路，雖然期間也有拍戲，但產量寥寥可數，相對前年憑露暈娜寫真彈出的娜姐，兩年間已拍戲逾10套，JC去年上位後也旋即獲點名拍戲。
對於眼前兩股強勁後浪，來勢洶洶，大有推倒前浪之勢，Theresa卻抱大無畏精神：「我知家巿場競爭大，近年好興呢啲後生仔女為題材嘅電影，不過，我相信每個人都有唔同位置。」
為抗後浪，Theresa自爆保持新鮮的妙論：「我本身每年都當自己係一個新人，無論係唱歌或電影，都抱住學習態度，我要keep住upgrade自己，我知做得耐會『滑牙』，所以我畀自己keep住做新人，去學多啲嘢。」教學雙長，Theresa與娜姐和JC兩位後輩合作又學到甚麼？她說：「唔好話學，係欣賞，佢哋兩個拍呢部戲好辛苦，但又好捱得。」
娜姐：佢食好多NG
近年拍戲不多的Theresa，直言接拍《熱》片時一度出現生疏，開工後才慢慢調校適應，她尷尬說：「我承認有一段長時間冇拍戲，真係要時間適應，好彩同演員對手熟絡咗，大家好易投入，我仲要多得戲中男朋友林子善帶我入戲。記得第一日開工，我要拍扮嬲戲，但自己竟對住鏡頭唔識嬲。」那豈非累拍檔NG連場？正當Theresa欲以不記得NG數目迴避問題，身邊的娜姐即口快快搭嘴爆料：「佢（傅穎）係食咗好多NG，因為同場林雪太入戲，成日激動到爆粗，我哋大家都忍唔住笑。」
《熱》片着重女演員戲份，眾女在合作期間可有爆是非或不和？娜姐說：「拍呢套戲太虛耗體力，真係冇精力去拗撬，有拗撬都喺戲中拗晒。」JC表示當遇上大家心情不好，彼此會匿埋玩自閉，她說：「自己會保持肅靜，盡量避開免生拗撬。」
JC尋找銀幕男友
JC妒忌娜姐和Theresa在戲中分別有羅仲謙及林子善為伴，惟獨只有JC形單隻影，她說：「下次再拍愛情故事，我必要向導演要求也給我一個銀幕男朋友。」