不久前收到香港大學之ConvocationNewsletter（香港大學畢業生議會通訊，二○一一夏季號），封面標題係ALegacyofExcellence，內容主要係報導香港大學之眾多明德教授席及捐贈人，睇完就知道港大傳統深厚，捐款人之多，無與倫比。其他大學難望其項背。
上星期收到「中大校友」二○一一年六月號，呢本係季刊，今期主題講一啲退休校友嘅退休生活，如余子平、張建雄、高靜芝、白耀燦、李明逵、區月晶、黃奕鑑、葉秀華、紀治興幾位，記者文筆唔錯，寫得幾生動活潑有趣。
兩本校友刊物之印刷、編排，清楚顯示出兩間大學之文化不同，傳統唔一樣。港大嗰本重啲、大啲、厚啲，以學校紀事為主，中英雙語並用，夠穩重，但冇雜誌感覺，只有左丁山呢啲唔怕悶嘅人先至會由頭睇到尾（此乃職業病！）。「中大校友」就比較細本啲，用薄紙（慳郵費吖嘛！），內容聚焦於校友故事，較有「人氣」，似足一本周刊形式，編排活潑，加插不少圖片，睇落唔會悶親。以編寫角度睇，港大畢業生議會通訊好容易編啫，只不過中英翻譯就會用多唔少時間。「中大校友」就煩咯，若非專業編輯，記者主其事，會做死人，好彩編輯委員會有梁天偉（壹週刊創刊總編輯，現樹仁大學新聞系主任）、黎廷瑤（東周刊社長）、盧覺麟（am730總編輯）、齊禧慶（報界資深編輯）等校友睇到實，先至可以維持水平。
雜誌架上有一份南加州大學（USC）校友雜誌，叫做USCTrojanFamilyMagazine（2011年夏季號），呢本雜誌嘅晒士與「中大校友」相同，紙張較厚，編排平鋪直敍無甚新意，但勝在有不少靚圖片，而且不少係好有心思，設計過嘅，勝「中大校友」一籌，要做到咁嘅效果，就要攝影師夠醒，校友肯合作至得。南加大係有錢大學，資源充足，出版校友雜誌相信冇中大咁多預算限制，拍攝圖片有多啲想像空間。唔好睇小大學校友雜誌噃，對聯繫校友及促進捐款，幾有作用o架。