張栢芝因婚變影響工作，先後缺席新片《影子愛人》及《楊門女將之軍令如山》內地記者會，又疑詐病甩底四川騷，早前更傳她拍《楊》片時失場，向太義助導演陳勳奇尋人，但栢芝不接電話，令向太十分激氣。
爆岳少利誘簽約
向太昨直指栢芝在該次事件中處理不當，她說：「嗰次栢芝冇聽電話，可能係面對唔到做錯事，但事後佢有send短訊道歉。最近呢次同佢傾電話，我有叫栢芝唔好再失場，要收斂，今次佢真係聽話要改，唔好錯完一次又一次，演藝生命好短o架咋，如果唔係唔襟撈。我作為長輩要提醒，好多傳聞喺我耳中，要教佢做個好演員，一定要專業，叫佢生性，都係想佢好啫。」
近日栢芝有意泊林建岳碼頭，向太承認栢芝曾就此事問她意見，向太說：「栢芝話林建岳畀好大嚿錢簽佢，佢問我意見，我話如果好條件咪簽囉，栢芝就話如果我開戲，佢只係收我一蚊，佢對我都有情義嘅。」