吉普車？我知！四四方方、攀山涉水、成架軍車咁款，未試過都知難揸兼Chok到飛起。Jeep最新四驅力王Wrangler，今年都要趕潮流，首次披上橙色外殼，內櫳亦變得更豪更舒服，毋須爭拗替補機制，07舊款出缺後，新Wrangler肯定大熱當選！
記者：徐影龍
攝影：林栢鈞 Model：Dominic@GME
泵把激凸變成凳
Jeep旗下Wrangler，一如過往推出雙門及四門Unlimited版本，而且大玩ColorMagic，首度採用金屬橙色做車身，將舊有實幹風格大翻身，但泵把、裙腳同篷頂依舊用番啞黑色，保留番Jeep嘅沉實霸氣。換新色猶如換新衫，好似大隻佬羅莽突然變羅仲謙一樣，有霸氣又夠Young，啲女俾你媾晒啦。但數到霸氣散發，始終係四方鼓脹外形，由車頭到車廂，無一忽稱得上流線型，四條GoodYear巨轆霸氣橫溢，前方泵把連輪拱位，更係凸到離晒譜，據車行老闆Ronald講，激凸成咁，主要方便車主攀山越嶺搵啱位釣魚時，可以當凳坐喎。
我係開篷狂，就算當日遇着打風落雨，都要匿喺停車場揭開篷頂先安樂。前方左右兩件篷頂，又輕又細件，啪兩啪就拆到落嚟，車後嗰件大嘢先係問題，一個記者加攝影師，抬到中途要嗌停，因為實在太重！睇嚟兩個瘦仔，都無資格做Wrangler車主喇。
內櫳舒服如SUV
Jeep喺香港唔算熱門，計埋稅仲要成幾十萬，覺得Ronald一次過返兩架都幾大膽。點知新車到埗冇耐已經「名花有主」，除咗因為一紅一橙車身喺香港算少見外，最重要係Wrangler內櫳大變身，設計風格夠潮夠In，如三幅式軚環、曲面唱機、電鍍波棍頭、多項金屬飾條等，整體感覺不再沉悶單調，防水座椅亦以布紋點綴，坐落軟熟舒服，仲新加入電子油門同電側鏡。走入車廂，差啲以為自己坐緊SUV而唔係Jeep，相信以城市四驅用途為主嘅香港人，始終最Buy都係舒服呢一點。
值得一提係美國版支四驅波棍設喺左邊，普通波棍則喺右邊；到港嘅右軚版居然無掉番轉，普通波棍變成更近司機位，揸落更加就手喇。
JeepWrangler
引擎：3,778ccV6
馬力：202bhp/5,200rpm
扭力：237lb-ft/4,000rpm
傳動：4速自動波箱，四驅
售價：3萬美元起（未連稅）
查詢：69364447（WaldHK）