噚日公眾假期加埋周末同周日，唔少人趁住呢個長周末出埠充吓電。噚日喺機場唔單止人頭湧湧，仲星光熠熠，親情滿瀉，其中任賢齊一家四口，包括老婆Tina同一對仔女及傭人就出發返台灣探親兼度假，起初問小齊同家人去邊？佢只係透露度假relax吓，不過最後都話係返台灣。見小齊一對仔女精靈活潑，一家人齊齊整整真係開心。
梁家輝送女離境
另一個爹哋級嘅藝人喺機場出現，佢就係歌神許冠傑，不過佢放棄一貫嘅豹紋打扮，改着格仔衫現身飛去新加坡做騷。問到有冇留意鋒芝婚變，許冠傑話：「我都有留意，幾可惜o架。」講到夫妻相處之道，佢就冇多講，話呢啲留番佢哋自己搞掂！
另外梁家輝就做廿四孝老竇送佢對孖女嘅其中一個到機場，佢個女眨吓眼已經亭亭玉立變身索女，着住白恤衫黑褲挽住個紅色袋，仲襯埋紅色指甲油不知幾搶眼。雖然個女已經咁大個，但臨入閘前家輝依然同佢嚟個抱抱，依依不捨。而成龍就揹住背囊話去北京做嘢，急急腳入閘。