博士撼教授，點鬥？但如果前者真係有銜頭，後者只係虛銜就勝負大定。前日獲Stirling大學頒發榮譽博士名銜嘅費格遜，喺球壇幾乎要風得風，氣燄當然蓋過綽號教授嘅阿仙奴領隊雲格。所以，費Sir決心搵拿斯尼接替盛傳隨時掛靴嘅傑斯嘅位置，恐怕雲格頂唔住囉。
話就話近日英國傳媒集中報道溫網、波亞斯上「車」，但費Sir一有新聞，就即刻搶晒鏡。費格遜前日着上一身博士袍，滿面春風接受榮譽博士名銜，大談過去求學嘅經歷。好老實，我求大俠同球迷一樣，對佢以前求學點滴真係興趣不大，只係有興趣佢斟拿斯尼一事進展成點。據英國《太陽報》講，費Sir成竹在胸，主要原因係拿斯尼似乎已經厭倦冇錦標嘅日子，而法比加斯離隊成數好高，實力一定打折扣，拿斯尼棄暗投明亦合情合理。
傑斯擬掛靴 拿斯尼頂上
費格遜同雲格喺90年代中至今明爭暗鬥十幾年，以前互有勝負，家陣形勢就一面倒；記憶中，費Sir從未試過咁高調喺雲格面前攞人。雖然雲格顯然唔多想將拿斯尼賣畀死對頭，但球會擺明要錢唔要人，問題係2,000萬鎊（約2.5億港元）好似差少少，或者費Sir要加碼。
費Sir堅持要拿斯尼並唔係冇道理，因為《每日星報》言之鑿鑿話聲名狼藉嘅傑斯，已經對足球事業發展心灰意冷，只係諗住點樣挽救婚姻，打算即時掛靴，就算失去400萬鎊薪酬亦在所不計。據有一定江湖地位嘅曼聯球迷網站www.uwsonline.com指，傑斯已經準備追隨加利尼維利同埋史高斯，一齊退休，費Sir想挽留都未必成功。近年傑斯經常移入中路，佢嘅空缺，拿斯尼勝任有餘啦。