無綫花旦楊思琦大前日狠撇同居男友李永豪，女方即被揭戀上北京富豪AndyNg，並懷有兩個月身孕，她昨日罔顧安全飛車到尖沙嘴一商業大廈，內有中醫館，同時又封嘴避談分手原因，豪仔卻情深款款表示希望與思琦溝通，為挽回戀情作最後努力。
楊思琦大前日自爆與男友李永豪的9年情玩完，分手原因耐人尋味，有傳她搭上北京富商兼舊同學AndyNg，並懷有兩個月身孕，所以火速撇舊愛。思琦和豪仔這對過氣情侶昨日分別愁爆現身，看來分手對他們打擊不輕。
早前還傳出豪仔計劃年底迎娶思琦過門，但卻峯迴路轉，分手收場，思琦過去幾個月已搬離與豪仔同居愛巢，她昨午偕母駕車由清水灣半島外出，飛車切線直達尖沙嘴，兩母女下車後即分道揚鑣。
爆瘡思琦封嘴
盛傳懷孕的思琦，穿上鬆身裙同平底鞋獨自到了加連威老道的太興商業大廈，她一臉憔悴，臉上更出現粒粒，面對記者還強顏歡笑，她進入的大廈有中醫師和美容院。追問思琦懷孕傳聞時，她隨即收起笑容，再追問有關新歡Andy時，她繼續封嘴避談，但臨上樓還友善提記者小心睇路。
豪仔昨日返無綫電視城拍攝新劇《拳王》，並表示沒跟思琦聯絡，卻直認收到女方愛豪想豪的曖昧短訊，豪仔說：「瞓得差，人比較亂唔知講乜嘢，家只係想畀情緒靜一靜，呢排發生好多事。」豪仔日前曾自爆思琦以「有喜」為由向他提分手，但他昨日卻避談：「我唔想評論，我只係好簡單，想知清楚啲，冇嘢可以一時放得低。我想同佢溝通了解吓，事情未必係佢諗咁嚴重。」
施明：好心痛
豪仔的微博有關注Andy，但他卻拒提可是認識情敵，只搖頭嘆氣，他下一步可想挽回與思琦的戀情？他說：「我唔想畀咁大壓力佢，我好擔心佢，我梗係鍾意先同佢行到結婚，唔會幾日間就將感覺丟低，我唔知將來係點，但只要佢要我幫，我一定幫，家嚴重嘅係我唔知佢諗乜嘢，自佢搬走咗，我就唔知佢諗乜，唔知係咪受人影響，定聽到乜嘢說話。」
豪仔母親施明非常擔心兒子面對不到失戀傷痛，她昨日在電話中重複說：「我只知豪仔好傷心、好痛，做阿媽呢刻梗係顧住個仔，我要維護佢心情，未見過佢咁傷心，見佢咁痛，我都好痛，家最緊要係我個仔，無論點都想佢平復心情先。」
採訪：何慧斯、譚倩宜
攝影：彭琮然
