【鋒芝變之舊主護航】鋒芝5年婚姻破裂，形象插水的張栢芝四面楚歌，據悉她日前曾致電昔日伯樂、中國星老闆向華強太太陳嵐哭訴，聲稱已經不愛霆鋒。昨日向太接受本報獨家專訪直認接獲栢芝的真情剖白來電，她心痛表示，栢芝每次被霆鋒情傷都情緒波動，變得躁狂及喜怒無常，向太更親口證實08年淫照風暴時，栢芝因被霆鋒冷待而興起抱子跳樓的輕生念頭。
鋒芝情路兜轉，張栢芝和前經理人、中國星老闆娘向太陳嵐的恩怨情仇也同樣峯迴路轉。早年栢芝在中國星旗下時，向太視她如女兒般看待，且愛屋及烏照顧其家人，其後雙方卻因解約問題打官司，一度反目。
相隔多年，向太和栢芝的緊張關係早已緩和。至近日鋒芝婚變，有指栢芝榨乾霆鋒身家、玩親子騷大龍鳳、潑婦罵街鬧老公、將一對兒子交化妝師照顧等等，她一身罪名形象插水，惟獨向太雪中送炭，據悉她近日接受有線訪問並力撐栢芝，記者前日致電向向太求證時，她直認屬實，更透露曾接獲栢芝來電哭訴，宣洩委屈。
機艙合照非導火線
向太在電話中說：「早幾日栢芝打畀我，都知佢唔開心，佢話當我好似阿媽咁傾偈，中間佢都講到喊。」鋒芝搞離婚，向太有否勸栢芝？她說：「呢啲家事外人好難插手，只有聽佢講，畀佢宣洩，我叫佢夫妻相處要容忍，但栢芝同我講，話已經唔愛佢（霆鋒）啦。如果有一日佢哋去到無可挽回，都有勸佢要為細路仔保持友好關係。好似拉姑（狄波拉）同四哥（謝賢）離咗婚都共同撫養子女，咁會令兩個細路仔唔使咁可憐，可以得到父母嘅愛。」
栢芝和陳冠希（Edison）的機艙合照意外引爆鋒芝婚變，原來栢芝也跟向太提及，向太說：「其實栢芝遇番Edison之前，已經同霆鋒分居，所以佢先去台灣過生日，佢喺飛機遇到Edison打招呼，栢芝話因為自己信咗主，所以原諒Edison，要寬恕別人，我就覺得栢芝應該唔好喺飛機度同Edison打招呼，當佢透明，家咁做（合照）就有啲唔畀面老公。」而據資料，栢芝早於04年已自稱是基督徒。
淫照後欲抱子輕生
昨日向太在上環再度接受記者訪問，她表示08年淫照風暴時，栢芝已曾致電她訴心曲，向太憶述：「嗰時栢芝好徬徨，情緒好down，仲有輕生念頭，霆鋒將自己困喺房，我同栢芝講你老公會原諒你，你千祈唔好攬埋個仔一齊跳樓，當時我安慰佢唔好咁做，佢都有聽我勸。栢芝係有好多做錯嘅地方，我當佢好似哎吔女咁，佢認錯之後會原諒佢，希望佢好，栢芝喺最近呢次嘅電話度話唔愛霆鋒，但我覺得栢芝係好愛霆鋒，仲多過霆鋒愛栢芝，家佢哋夫妻間發生問題，誰是誰非只有佢哋最清楚。」
向太續說：「栢芝話佢同霆鋒嘅感情問題，同Edison飛機事件冇乜關連，係霆鋒攞咗金像獎影帝後，態度變化大，栢芝頂唔順先搬出嚟。」
稱撐起頭家壓力大
向太又指栢芝是為了霆鋒才情緒波動，「好似嗰時介入王菲嘅感情，霆鋒同栢芝分手，已經傷得栢芝好緊要，嗰時佢成個人失控，身體又差，我求杜琪峯、爾冬陞開《大隻佬》、《忘不了》，救番佢上去，點知佢唔記得對白，變到狂躁、喜怒無常，但呢樣同佢本身家庭都有關係。栢芝係個好可憐嘅女仔，父母離異，靠佢一個人撐起成頭家，壓力好大，所以情緒波動得好犀利。」
採訪：陳月媚 攝影：黃偉雄
