林欣彤同莊思明、張秀文等前晚喺電視城錄影「2011/12青年發展活動啟動禮」，陳庭欣突然嚟探班，佢早排被影到同黎諾懿喺赤柱拍拖行街，之後又被發現同翟威廉喺荷里活廣場蹺手行街，但庭欣話全部只係朋友食飯，問佢鍾意黎諾懿定翟威廉多啲？佢話：「朋友邊有得分，我入行唔耐，識嘅男藝人唔多，都俾你哋影晒，冇朋友做呀。」
講到翟威廉，庭欣話：「嗰日喺將軍澳打完golf，順便約食飯，佢腳傷咗，咪喺佢屋企附近食囉，個商場有活動，係拍拖又點會去嗰度俾人影？當時只係扶佢，唔係蹺手。」
提到威廉同庭欣各有另一半，庭欣自爆同男友散咗：「散咗一段時間，冇同人講啫。」咁講係咪暗寸楊思琦？庭欣謂：「唔知佢分手，感情都係自然啲好，一齊同分手對大家都有影響，所以想低調處理。」
莊思明認小四
另一港姐莊思明最近被發現同陳司翰約會，仲俾司翰摸屁股，思明話：「佢扶一扶我咋，角度問題。」佢又話當時係成班朋友一齊。據聞司翰有女友，問思明係咪做小三？佢話：「我喺屋企排第四，我係小四，唔會搶人男友。」對於司翰曾被指打女友，思明話：「一個人唔會無端端打人。」