【本報訊】時間巨輪無人可擋，但一群藝術家以巧手「螳臂擋車」，將香港早已失落或逐漸消失的景物，製成一件件微細模型，栩栩如生得讓市民如再次走進九龍城寨的陰暗角落，或酷熱的天台屋，又可以到凉茶舖聽歌，或跑到街角看小販炒水曱甴。
Tony是建築模型師，製樓盤模型，「近年都由內地工人做，我只係監工」。技癢的他公餘落手落腳砌微模型，「而且唔使跟住則師嘅圖嚟砌」。微型藝術是將不同建築物、景像按比例製成縮小版模型。他新製的天台屋模型，無論鐵皮屋頂、石屎牆、碌架床、屏風等都是自製，同是膠板，「但以唔同技巧做出唔同質感」。Tony一雙大手想不到如此精巧，室內陳設大至電視、冰箱，細至80年代雜誌都造功細緻，或全賴具五年的經驗。
太古城中心展出
工程師Ian只是微型藝術初哥，但作品「城寨孤巷」內，士多掛着的小食玩具，家居內的衣車等，絕不馬虎，更在舊式電視機內藏mp4播放器，「仲搵番幪面超人嘅舊片嚟播㖭」。微型藝術多着重「形似」，酷愛繪畫的他卻追求「神似」，砌出一條陰暗橫巷，當中水喉交錯、滿地積水，再放一隻流浪貓，營造出九龍城寨的神秘氣氛。
「我細個想做建築師，但父母話女仔做呢行好粗魯。」Macy只好從事另一專業，退休後透過微型藝術重拾兒時的夢，「呢啲舊式大樓都係我細個嘅記憶。」她更砌出老香港街頭炒水曱甴的小販攤檔，「細個見到好驚o架，但好多人食，家冇喇」。市民可於即日至7月17日到太古城中心「懷舊香港情」微型藝術展，欣賞共42件作品。
