油價升得快減得慢，不停創新高，車主叫苦連天，政府懶得理只顧谷電車。不過對於先天性因無電特別容易恐慌的香港人，要他們接受用電車似乎還需要一點時間。混能車始祖豐田Prius最新研發的PriusPlug-inHybrid，有電用電，無電就用油，絕對係針對醫治過敏性港人的最佳良藥。
記者：許維雅
攝影：林栢鈞
Model：Domanic、Hailey@GME
全電行走23.4公里
若要回顧汽車環保發展的里程碑，豐田Prius確實應記一功，利用油電混合驅動的Hybrid系統大大減低耗油量，比起傳統汽車排放更低。由當初考慮車價、憂慮電池耐用性等問題，至現在好不容易才讓大眾接受將電呢樣元素加入汽車之中。雖然Prius已廣受大眾歡迎，全球總銷量已突破300萬架，但絕不能原地踏步。為改善電與油之間的比例平衡，增強用電驅動效益，廠方成功研發了一款充電式油電混合動力Prius（PriusPlug-inHybrid），換上一台全新儲電能量更強勁的鋰離子電池，再於側鏡對下位置加裝一個如油缸蓋的叉電插頭，只要透過普通家居三腳電源插頭便可以充電。Prius加插後的新鋰電，於全電動模式（EV）驅動之下，最多可以行走23.4公里，慳番不少油費。比起普通Prius的25.25km/L耗油量，插電Prius平均油耗成功降至57km/L，每公里唔使$0.3，二氧化碳排放亦降至41g/km，更加環保。
改良電速 最快100km/h
PriusPlug-inHybrid不單止大大提升了行車用電的距離，還加強了用電速度，以往Prius只會於停車或時速50km/h以下才可使用電動模式，新鋰電的時速卻高達100km/h。測試當日由鰂魚涌出發，以正常公路速度去到清水灣銀影路，全程約15公里左右。到埗後，錶板雖然顯示餘電0.6公里，但唔好忘記塞車停燈位、開冷氣等都會耗電，加上起步前又花了些少電作拍攝用途，所以電量表現其實已不俗。至於充電方法就跟一般電車相若，將三腳插頭接駁一般家居電源插座，長方形黑色火牛盒上的橙色燈會亮起，代表可以準備充電，充滿需時約100分鐘，擋風玻璃前的橙燈會亮着。雖然充電步驟方便簡單，但礙於香港Flat多House少，充電配套又未完善，有Hybrid引擎作後盾的Prius當然令車主更加安心，用油行車時又會協助充電，一缸油加電馬達的行駛距離高達1,400公里，去幾遠都唔會望住錶板心慌慌。凡有iPhone都有件後備電喺袋的港人一定揀佢，只可惜暫時得一架供政府作測試，大家等多一陣啦。
PriusPlug-inHybrid
引擎：1,797cc直四VVT-i＋3JM電馬達
系統：THSIIPlug-in
馬力：99PS/5,200rpm（系統總輸出136PS）
扭力：142Nm/4,000rpm
傳動：無段變速、前驅
查詢：28801455（皇冠車行）