朗尼兄弟日前齊齊因「門口」而做咗新聞人物，但就一個好，一個衰。細佬約翰朗尼喺場美聯盃射爆FC紐約嘅龍門，幫紐約紅牛反勝2:1；至於佢大佬朗尼因喺個傷殘人士廁所門口行出嚟，搞到有人打大架，認真樣衰到爆。
累女歌迷食兜搥窩面
曼聯下禮拜一開操，啱啱植完髮嘅朗尼亦作最後衝刺，同老婆高蓮去參加喺格拉斯頓伯里舉行嘅英國草地音樂節，原本就冇乜嘢，點知佢因為人有三急而引起事端。話說上個禮拜六，獲安排坐喺貴賓席嘅朗尼有專用廁唔用，走去同其他人爭廁所，仲要搵個傷殘人士廁所嚟屙。在場有個等緊廁所嘅年輕金髮女子，因為不滿朗尼所作所為，於是上前理論，但朗尼好似借咗聾耳陳隻耳咁扮聽唔到，當個女人透明掂行掂過。嗰陣時好多人排緊隊等廁所，懷疑有人不滿個女人扮正義阻住晒，一拳就打落佢塊面度。之後啲人互相推撞，好彩在場保安反應快，控制到個場面。
現場目擊嘅21歲學生妹美瑾話：「有人被人打咗一拳，之後啲人就扭作一團。嚴格嚟講唔關朗尼事，但佢就真係好樣衰囉。喺朗尼離開廁所後幾秒，有個女人叫住佢，好似想同佢講啲嘢，但朗尼冇理佢，一支箭咁跑去搵老婆。啲人奇怪朗尼點解會喺傷殘人士廁所出現，佢應該係用VIP廁所o架嘛。」
朗尼事後透過發言人話，自己同打鬥事件無關，仲話係在場職員帶佢去傷殘人士廁所，唔係佢自己主動提出要去。但點都好，我求大俠認為朗尼身為公眾人物，好應該注意自己嘅言行；更何況身體健全都去殘廁，冇理由做啲咁腦殘嘅行為。所以，呢單嘢點講都係佢唔着。
朗尼其身不正入錯門口，間接搞出事，佢細佬約翰朗尼就入啱門口，結果仲做埋英雄㖭。約翰朗尼喺前日嘅美聯盃第3圈入致勝球，幫紅牛反勝FC紐約2:1；今屆佢喺美職聯上陣唔多，淨係踢咗27分鐘，希望佢之後會受到會方重用啦！
