賭王三房長女何超雲和陳山聰遊埠近月，樂不思蜀。三太陳婉珍爆超雲仍要多玩半個月才回港，更指連賭王都日夜掛念她，叮囑超雲早日回來。至於超雲和陳山聰拍拖，之前盛傳反對的三太，坦言不反對女兒同任何人認識，但「要對我坦白」，不想女兒對她有所隱瞞。
賭王三房長女何超雲離港多時，與緋聞男友陳山聰遊埠玩樂，忘形到連父親節都不回港和賭王慶祝。三太陳婉珍昨日在灣仔出席東華活動，透露超雲要下月中才返港，看來未玩夠，三太說：「佢家喺歐洲，同好多朋友一齊，應該月中返。」
超雲和陳山聰一齊？「我唔知，我冇問佢。」超雲連父親節都冷待，三太做媽咪就為女講好話：「唔係，佢都好乖，有送嘢，又有打電話畀爹哋。」
「成日問去咗邊」
超雲遊埠近一個月，三太承認連賭王都心掛掛：「何生都成日問我，佢去咗邊、佢喺邊，我同佢講話超雲未返，佢都想超雲快啲返。」明顯只掛住拍拖，她說：「拖係年輕人、後生仔都想拍。」
之前有指三太不喜歡超雲和陳山聰一齊，問她現時可是不反對？她說：「我唔反對佢同任何人認識，我係在乎佢有冇應有嘅態度，我唔會干涉佢交朋友。」她不覺超雲反叛，指兩人每日都有通電、傾偈，超雲和陳山聰早前被影到拖手，三太說：「我諗，如果做朋友或者拍拖，呢啲係無可厚非。」問到三太是否已經碓認了超雲和陳山聰拍拖，她則暗示未能確認：「呢啲要等佢對我坦白囉。」
微博忽然感觸
繼續歐遊的超雲，在微博繼續風花雪月，一時謂吃nicedinner，一時自爆被蚊咬腳，昨日則頗有感觸的寫上「今天才真正了解謀事在人…成事在天的意思」，莫非和陳山聰的戀情有新阻滯？
此外，現時任東華總理的王賢誌，透露上周五在君悅遇上近期忙於上庭的陳志雲，更獲他讓出一早訂好的枱吃午餐：「佢企喺我隔籬，好好人，送咗張枱畀我，我都有多謝佢，佢心情都冇乜嘢。」他指兩人間沒誤會，但未建立起友誼。
採訪：LoMui
攝影：WongManWai