多年前的劉美君（Prudence）工作日接夜、夜接日，身為別人的太太、母親以及女兒的她，每天只有幾小時休息。雖然工作為她帶來很好的收入，可惜她並不快樂，更開始迷失了自己，當年她放棄事業走到美國展開新生活。現時的劉美君不再是工作奴，而是享受工作、享受人生以及享受談戀愛的快活人。
近年很多人都會套用「你幾時又走呀？」這句話於劉美君身上，Prudence即解釋說：「我邊有成日走呀，上次我返香港真係做咗好多嘢，又做主持又出碟又做騷。呢隻《LoveAddict》本來喺一年前出，但係真係做唔切，我份人真係唔逼得o架，好彩公司都好好，從來唔會『焗』我做嘢。」
新碟重唱經典
Prudence強調不想做出沒有質素的作品，對不起歌迷之餘亦過不了自己的關口，她說：「以前一年出幾隻碟，當中其實有啲作品我係唔滿意o架，我家絕對唔會做一啲唔滿意嘅歌，我對工作100%投入。」而《LoveAddict》是重唱一些經典國語歌，對於Prudence來說有一定難度，不過她向來喜歡挑戰，她表示：「挑戰越大，我就做得越開心，我份人就係咁o架啦，我唔怕唱完之後啲人拎嚟比較、亦唔怕批評，因為我相信自己。」
愛情重視忠心
就是因為相信自己，Prudence對愛情亦絕對投入，她坦言以往將愛情睇得很重。經歷過兩次離婚，雖未至於令她對愛情失去信心，卻令她更懂得去愛自己，她說：「家覺得血緣關係好重要，有愛情生命就豐富啲，就好似食飯多味甜品。我對男朋友冇乜要求，坦誠相處、忠心已經好足夠，呃我嘅話就冇彎轉啦。」
採訪：李珮洳 攝影：葉君海
Styling：QueenieYu
髮型：GarySunofLeSalon
化妝：KrisWong 服裝提供：DrexFable
場地：ClubLounge（都會海逸酒店）
