七一你會遊行嘛？行開中環我有好介紹，「來佬餐館」聽日喺威靈頓街正式戙旗，大玩六七十年代老香港舊情懷，樓面裝修設計暫時雖然只得電腦設計圖，不過望落相當有《狂潮》Feel，如果男嘅着番件關刀領恤衫，女嘅笠番條One-piece勁窄連身裙，分分鐘以為係周潤發配繆騫人。無計！老闆係投資製作過百部電影嘅羅傑承，門面嘢一定跟到足。講番星級懷舊菜，望餐牌有威靈頓66鐵板餐、來佬汁乳鴿、瑞士汁甜豉油燒鴿，必食之選大把有得你揀。
砵酒焗牛尾飯同葡汁燴雞飯，兩款都賣$48，我會買返屋企慢慢嘆。點解？一來價錢合理，二來連個飯盒都好落重本，環保紙盒配保溫拉鏈袋，另附立包裝刀叉同毛巾仔，咁招積，買嚟望吓都要啦。
記者：朱崇德
來佬餐館（31253000）
地址：中環威靈頓街66號
