大話講得多，連自己都呃埋，有人講古仔講到天花亂墜眼都唔眨，知嘅就會笑死，唔知就肯定嚇死。兩隻股份，齋看冧巴門牌份屬隔籬鄰舍，炒作年代卻分先後，細冧巴可由趕及千禧年科網股爆破前上市，時機拿揑堪稱一絕，因為要等下一個當炒概念──濠賭概念──發酵登場，起碼要等到04年至出現。
經紀要開飯，莊家要搵食，有心人惟有喪玩無中生有，你又砌時佢又砌隻殼，已經有現成上市殼嘅主人就實行靜靜地起革命。而另一冧巴門牌碰巧又係科網產品，雖錯過濠賭概念升溫期，後來都成功抓住資源機遇食正大浪。
要市場真金白銀貢獻就要有噱頭，名人效應是其一，但有冇朋友真係見過大孖沙真金白銀接貨，抑或純粹借個名畀世侄一用？甚至只係Authorizedtrader家臣借個倉落盤，既然老細個倉位有影響力，自己個倉就即時受惠。
名人效應信唔過
當年無意中喺大氣電波中以事論事，見有股份每次配股，配股價越配越低，覺得不尋常而作出溫馨提示，冷不防翌日同另一位節目主持遭5份報章只用筆名出稿嘅投資版專欄聲討，口口聲聲話我倆冇做功課。其實倒不如直接指控我倆一不小心化身成為少林拆棚大師，拆咗人家雞棚，令對方在一眾寫手前呼後擁下，仍無法成功配股吸水。
最難得的是，細價股永遠有魅力吸引無知而又貪心嘅師奶阿叔，市況雖大玩塘水滾塘魚，不合乎邏輯嘅故事仍能取信於人，實在令人啼笑皆非。雖說若然不報，時辰未到，假如要報，卻又竟然禍不單行，講起都實在巧合，可以捱足十年至火燒連環，都算持久力強，也稱得上係浪費光陰，假如用喺正常經營而非炒炒賣賣之上，可能在金錢利益以外，兼可賺得名聲。
胡孟青
作者為獨立股評人