呢一兩年間間戲院都大吹立體風，唔少影迷都唔介意畀多幾十蚊睇「激凸」畫面，不過以為咁樣就係極限？非也！3D享受已經out啦，想更強嘅感官刺激，就要試試旺角嘉禾新增嘅MotionChairD-BOX！
記者：王震遠
攝影：伍慶泉
Model：Rainbow@PureModels
嘉禾院線（22644138）
亞洲第二香港第一
3D影院將平面電影變得更立體，不過始終只能刺激視覺，想感同身受就一定要觸動到分佈全身的觸覺。最近嘉禾院線使咗過百萬，由外國引入19張越來越流行嘅MotionChairD-BOX動感椅，選址嘉禾旺角2院做試點，成為全港首間擁有D-BOX嘅戲院，是繼日本後第二個裝置D-BOX嘅亞洲戲院。
全方位三級chok
動感椅能夠觸動到全身感官神經，原來是D-BOX玩法與別不同，因為佢唔只識得震，直情識得chok，配合畫面內容，郁動程度有如玩過山車咁刺激！D-BOX設有三個強度給用家選擇，可根據不同人嘅「防chok」能力而作出調整，用家只要坐上座椅，就會自動啟動D-BOX，所以唔會見到一排空椅搖動嘅情景。呢一張座椅內置咗活動裝置，經由電腦接收電動指令例如震動或搖動，所以會識得根據畫面內容作出唔同程度嘅搖動效果，包括上下、左右同前後。有咗呢個咁全面嘅搖動範圍，配合一連串嘅體感設計，比起只有震動效果，感覺更全面同立體。
度身訂做體感反應
至於體感動作設計，當然唔係亂咁嚟！每一套入選MotionChairD-BOX編碼庫嘅電影，都會由專業程式員因應電影情節去設計搖動效果嘅編碼，所有體感反應都跟畫面情節直接有關，而且跟畫面內容完全同步，就好似親身feel到主角嘅感覺一樣。同一般的震動椅唔同，由於D-BOX嘅所有動作都係經過電影導演親自審批，所以比起以往只有畫面同聲音嘅感受，D-BOX可以幫你更全身投入電影世界。
「體」驗D-BOX
親身試：同主角一齊chok！
想感受D-BOX，情況都同3D電影相似，因為唔係套套戲都支援到。嚟緊暑假大作就有《哈利波特：死神的聖物2》支援D-BOXcode技術，上映中就有《S8驚世檔案》同《加勒比海盜：魔盜狂潮》。小記親身試睇過《加》片，見到船長嘅招牌左跌右跌動作，D-BOX會跟住相同方向一齊chok，唔止大細震動咁簡單，而係一連串動感體感反應令人更加入戲；而不同場景如海盜船、馬車等，亦有相關嘅搖動頻率令人覺得置身其中，難怪Model都感覺到同主角一齊郁咁款。不過票價就比普通電影飛貴多$40，但就可身處戲院最高幾行嘅靚位，抵玩！
戲迷有Say
D-BOX出去震
屋企震！
其實要感受D-BOX嘅電影世界，唔一定入戲院，華仁影音就有售D-BOX體感系統，只要加入組件就可以令梳化椅震動同搖動，家中都可以有影院級享受。不過要睇D-BOX都要有支援編碼嘅影碟，美國唔少大廠都有加入陣營，現時已有過千套支援D-BOX編碼嘅影碟推出市面。值得一提的是，除電影外D-BOX更有遊戲系列，例如《NEEDFORSPEED:SHIFT》等遊戲都support得到。
華仁影音（27877992）
震足360°！
TheGrandCinema係全球首間「超體感」影院，12間細院共有過千張震動座椅，仲特別引入「Infrasonic系統」，當座椅感應到人耳都聽唔到嘅超低音頻（Infrasound）時，座椅就會產生不同程度嘅震動，而且座椅頭部就會用穿透式氣孔物料，令兩邊、後邊嘅音效同前方一樣，造成360°環繞音響效果，令電影變得更震撼。
TheGrand（21968170）
套套震！
想坐動感座椅，在百老匯院線中可選擇到尖沙嘴TheONE。影院中隔行就設有震動座椅，震動效果會根據不同影片的超低音頻來配合。好處係套套戲都會有呢個效果，只要個Bass夠重，就可以享受得到動感反應。月尾百老匯更會將震動座椅推至旺角分店，配合即將上映嘅新片《變形金剛：黑月降臨》。
百老匯（23880002）
