北韓女足周二喺世界盃C組賽首戰，以0:2不敵美國，以戰果計，都唔算太失禮；話晒美國係兩屆冠軍，家世界排名又第1；北韓門將洪明姬雖然今場波慌失失，又甩手又出迎欠準，不過失兩球波都唔太關佢事。北韓守到下半場先失守，54分鐘羅倫珍妮頂個靚頭槌先開紀錄，76分鐘後衞保娜勁射得手，幫美國贏2:0。
不過賽後北韓教練金光民爆料，話唔係部份球員遇上雷擊，鹿死誰手都未知。金光民講，大軍出發前喺平壤練習，點知「俾雷劈」，4名後衞同部份中場受傷，醫生更話佢哋不適合咁快上陣，不過為國爭光，就決定頂硬上踢世界盃。雖然有云「大難不死，必有後福」，北韓女將雷劈都未死，但改變唔到輸波命運，希望領導人體諒佢哋，唔好搞到好似男足咁，輸波要去勞改同做礦工。