【鋒芝變之興風作浪】張栢芝不在港期間充當湊仔公的化妝師RickChin，昨日出席一個公開活動時，不但反駁網友對其不懂照顧小朋友的指控，更聲言栢芝沒阻止謝家兩老跟孫兒見面，要見他們隨時都可以，更爆陰毒有意無意間透露兩名孩子只說掛念媽媽，完全沒有提起父親謝霆鋒。
化妝師RickChin及EricKwok跟謝霆鋒及張栢芝分別熟稔，兩人昨晚同出席一手錶品牌在中環舉行的宣傳活動。Rick受訪時指栢芝不在港期間，自己差不多每日都會去照顧Lucas和Quintus：「上去同佢哋傾偈同玩，佢哋唔識睇雜誌唔知父母發生事。」
稱兩老可探孫兒
問兩小孩有否掛着在大馬工作的父親謝霆鋒，被指屬栢芝陣營的Rick不忘放箭說：「佢哋冇話掛住爹哋，但就有話掛住媽咪，栢芝每個鐘都打一次電話返嚟搵兩個細路。」對於有指謝家兩老四哥及拉姑未能跟孫兒接觸，Rick說沒可能，只要他們打電話給栢芝及霆鋒就肯定能見孫仔，更不忘為栢芝說好話指她昨一下機就趕回家跟兒子見面。
另外，跟霆鋒夫婦相熟的EricKwok指兩人分開的原因很多，他肯定跟第三者無關：「原因好多，唔方便講，但肯定同陳冠希機艙事件無關，淫照件事都過到，飛機嗰一張半張相唔會有問題，性格不合係導火線。」他又說霆鋒絕不會不理一對仔，並說：「其實兩個都唔抵幫，但佢兩個目前都要人幫佢哋度過，佢哋一直都冇停過挽救婚姻。」
栢芝中河東獅降
另外，栢芝日內要到寧波為新片《河東獅吼2》開工，其實她早於02年都拍過電影《我家有一隻河東獅》，當時正值她與霆鋒和王菲陷入三角關係，栢芝抵受不住困擾，情緒失控崩潰，暴瘦到皮包骨，但估不到九年後拍《河東獅吼2》，揮低王菲成為謝太的栢芝卻面臨婚變，看來她中了「河東獅降」。
採訪：卓寶花
攝影：葉君海
話你知：單方申請離婚等官判
霆鋒日前發聲明揚言會着手處理家事，簽字離婚已成定局，餘下只是栢芝是否願意離婚。記者昨就此事向黃國桐律師了解離婚程序，他指若一方不願意離婚，提出離婚的一方可向法庭申請，指證配偶行為不當或通姦，而被指證的一方可入答辯紙抗辯，最終由法官審理。
另外，子女撫養權和財產分配問題可同時交由法官審理，排期約一至兩個月。問栢芝能否在這段時間「霸住」Lucas和Quintus，阻止謝家人相見？黃國桐說霆鋒可向法庭申請要求見兒子。
