羅傑承自06/07球季再做南華足主後，試過搵葡萄牙教練，又用過南韓同本地教練，最終都分手收場，而羅生新季吸取過上季痛失聯賽同亞協盃參賽資格嘅教訓後，決定再試新嘢，以求重振少林寺聲威。
據我求大俠收風已經落實搵咗教過斯洛伐克國家隊嘅前捷克國腳中堅高世安（JanKocian）執教，南華仲準備由新教頭引入捷克同斯洛伐克球員，實行轉踢東歐式足球，同巴塞化嘅宿敵傑志再鍊過。
高世安剛與中超球會分手
羅生噚日凌晨響球隊部落透露，已經搵咗踢過世界盃決賽周嘅歐洲教練接手，仲準備簽約，噚日就有唔少球迷估南華新教練到底係邊個；當中有網民心水清話南華好大機會搵剛同中超江蘇舜天因意見不合，教咗5場就分手嘅高世安執教。
我求大俠噚晚亦收到探子回報，話南華已經斟妥呢位幫捷克踢過90世界盃決賽周嘅高世安，而呢個已53歲的前中堅後曾經做過德國老牌球會科隆同法蘭克福助教，06至08年仲做過斯洛伐克國家隊主教練，睇睇份履歷表相當唔錯。至於咁點解會嚟到香港教南華，求大俠就唔多清楚，但照睇應該可以食住南華班星級球員嘅。
推介平價東歐兵上山
據聞呢位東歐教頭早兩個星期更加專程嚟香港同羅生見面，仲睇過南華上季嘅比賽影帶，覺得球隊好多嘢要改善，有需要推介價廉物美嘅捷克同斯洛伐克球員畀南華。高世安同下月初就會帶埋體能教練嚟港，11號正式帶南華開操。
羅生噚晚就話，新教練人選好快會有公佈，但教練強調紀律、體力化、機動化及簡單的進攻模式，同佢要求確實幾脗合：「球隊計劃搵多3個新外援，分別前鋒、中場同左後衞，左後衞用嚟替離隊嘅潘耀焯；而球隊已經從唔同渠道收到4、50個來自世界各哋嘅新援資料，但最後用邊個，多數交由新教練去處理，唔排除由新教頭介紹球員。」
南華新季留番蘇沙、基奧雲尼同祖爾3件巴西兵，至於佢哋啱唔啱高世安心水，球迷可以同求大俠一齊拭目以待。
高世安小檔案
JanKocian
出生日期：13/03/1958（53歲）
國籍：斯洛伐克
場上位置：後衞
代表國家隊出場次數：26次（捷克）
曾執教著名球隊及年份：
斯洛伐克國家隊助教（1993-1995）
德甲科隆助教（1999-2002）
德甲法蘭克福助教（2002-2004）
德乙艾遜教練（2005）
德乙希根教練（2005-2006）
斯洛伐克國家隊教練（2006-2008）
奧地利國家隊助教（2008-2009）
中超江蘇舜天（2010-2011）