阿B鍾鎮濤上周六晚同女友范姜拍拖去咗銅鑼灣西苑酒家撐枱腳，10點幾食完，兩個人手拖手行出酒家，好鬼甜蜜，雖然商場好多舖頭已經關門，但佢兩個一樣好有興致咁windowshopping，逛咗成半粒鐘先至上車離開。
盧覓雪同區現身
諗唔到阿B前妻章小蕙嘅老友盧覓雪又喺差唔多時間出現銅鑼灣時代廣場，佢身旁係陳奕迅經理人陳家瑛，見佢兩個都攞住一袋二袋外賣，應該係食完飯，好彩阿B唔喺時代廣場嗰邊，唔係撞到就尷尬，因為早排盧覓雪評論阿B家事，俾B女鬧爆。
另一方面，范姜大前晚帶住親生女鍾懿同B女鍾嘉晴一齊去紅館睇蔡依林嘅演唱會，雖然嘉晴係阿B同章小蕙所生，但范姜對B女一樣照顧有加，睇嚟佢兩個感情唔錯。