試車當天，天文台掛起3號強風訊號，大雨之下夾雜着強風，吹得人仰馬翻咁滯，好彩今次試駕最新抵港的LandRoverFreelander2，它的全天候地形反應系統，簡直當「海馬」冇到，濕滑惡劣路面基本上如履平地，揸住佢，莫講話3號波，就算十號風球都無有怕！
記者：車倫禤
攝影：伍慶泉
Model：Jeana@GME
小改富陽剛
老實講，市面一眾SUV當道，但好多買家眼尾都冇望過LandRoverFreelander2，原因陽剛味不足之餘，又嫌帶點娘娘腔，雖然掛上LandRover牌頭，始終有種不是味兒的感覺。不過今次大家可以放心，廠方痛定思痛，今次代理引入的Freelander2屬最新小改版本。車頭換上粗邊鬼面罩和外方內圓的霧燈組合，在視覺上看起來的確比之前帶多點陽剛影子；車尾更直接加上一隻高置式小鴨尾，刻意營造出活躍動感，配合全新造型的18吋合金輪圈，斯文中又帶點粗獷味道，啱哂男人口味，與電視剛播完的「Law霸」形象確有幾分相似。至於車廂方面，基本沒大改動，只是加入桃木飾板及免提的藍牙系統，可直接將車內喇叭變成聽筒，方便到極。不過如果有密偈要傾，切記不要和藍牙對應，咪話我先前冇同你講清楚呀！
全天候理順
看完換上一身粗獷外衣之後的Freelander2，再看其骨子裏的3.2公升直6引擎，其實是有點意思的，233ps馬力和32.3kgm最高峯值扭力，在同級中雖不算特別標青，但走到路面上卻令人充滿無窮的驚喜，它的起跑加速反應充滿勁道，加上CommandShift六前速自動波可以作手動轉波，大大增加駕駛樂趣。而Freelander2精髓之所在，就是那套全天候地形反應（TerrainResponse）系統，駕駛者可以根據路面環境需要，自行設定行走模式，將以往艱辛難學的四驅行走要訣化繁為簡，而且車子更同時備有HDC落山車速控制系統，即使面對急流瀑布，一樣可以讓駕駛者輕鬆理順。
LandRoverFreelander2規格
引擎：3,192cc直6
馬力：233ps/6,300rpm
扭力：32.3kgm/3,200rpm
傳動：CommandShift六速自動
售價：$510,000
查詢：LandRoverHongKong（27132383）