食典1：唔上釣　擦到會麪包蟹

上魚排釣魚，齋聽都悶爆，咁諗大錯特錯，因為除釣魚外，仲可以勁玩Wakeboard同高速水泡。無魚上釣咩？勁擦到會海鮮宴補數囉，麪包蟹多膏到暈，釣到嘅魚又可以拎返屋企加餸，今次仲唔係又食又玩又拎滿載而歸？

記者：徐務研
攝影：陳陶鈞
Model：Phoebe、Jeana

一支公玩排釣

近十年八年，魚排開始開放俾人釣魚，對於釣魚發燒友嚟講絕對係福音，因為唔使約齊一班人租艇出海，唔使驚朋友一個唔該放你飛機，船費分分鐘貴到你唔信。排釣勝在一支公玩自閉固然得，約埋老死齊齊釣亦得，得咗！
嚟「榕樹澳魚排」釣外海魚，魚穫兩至三斤重等閒事，我係新手，無處入手，好彩有釣魚聖手光哥教路：「釣魚有唔同方法，可以用絲排，可以用魚竿，絲排勝在方便兼手感好，魚一上釣就立即感應到，通常用嚟釣泥鯭同火點；魚竿勝在就力兼拋絲距離遠，不過手感相對較弱，多數用嚟釣鱲魚。魚餌方面，最大路用南極蝦，氣味較重容易吸引魚上釣。」雖然得高人指點，但我實在耐性欠奉，坐定定唔夠幾分鐘已經呻悶，Phoebe好彩啲，釣到條泥鯭，我零收穫。

■釣魚聖手光哥

■由碼頭坐船到魚排，唔使十分鐘，方便快捷。

■竿釣勝在可以放長線，當然，釣唔釣到大魚全靠你技術。

■絲排，又叫手排，勝在夠方便，手感比較好。

■釣魚發燒友A：「釣魚一啲都唔悶，排釣好方便，唔似艇釣，要湊夠人數先出到海。」

高速水泡飛Bra走奶

魚排負責人Patrick見我哋悶到頭殼頂生菇，立即搖身一變成為船家，帶我哋玩水上活動。Wakeboard？我貪生怕死，只好精神上支持Jeana，Jeana都唔係省油燈，呷過三兩口鹹水，三兩下手勢已經起到水。
Phoebe則試玩高速水泡，但Patrick憐香惜玉，一味減速，「高速水泡絕對會令人飛Bra走奶，有次有個女仔玩到全身搵塊布都無，要圍住毛巾上水，所以我建議無論玩Wakeboard定高速水泡，最好着多件Tee，貪靚淨係着比堅尼好易出事。」「咁你都唔少好嘢喎。」「有時真係唔想，所以我一定提佢哋打底嘅。」高速水泡被浪頭拋起，左Fing右Fing，死命唔放手確實超刺激，一放手又有可能飛到幾米遠，真係好挑戰人膽量，我激唔起，都係留喺魚排唱K打麻雀穩陣。

■仲有K唱，音響係削啲o架嘞，但總有一瓣啱你玩咁囉。

■Jeana起水不成飲海水，船家大叫：「用腰力，唔可以出死力用手拉。」

■Phoebe大玩慢版高速水泡：「太快，我驚甩Bra呀。」

■怕水上活動太激，打番四圈又點睇？

蝦殼掉落海餵魚

玩完水上活動，肚仔咕咕作響，係時候醫肚。
Patrick捧出一碟碟到會食物，一睇，嘩，呢餐海鮮宴真係乖乖不得了，賣相最吸引當然數法國麪包蟹，麪包蟹居於冰凍水域，長年累月企定定唔會四圍郁，所以身體儲有大量蟹膏，多到可以一羮一羮出嚟食，勁正！有蟹當然有蝦，細細隻玫瑰蝦勁鮮甜，隻隻蝦都有蝦子，只見Patrick隨手將蝦殼掉入海，我勁鬧佢垃圾蟲，佢解釋：「我唔係掉垃圾，蝦殼蝦頭可以分解，係用嚟餵魚o架。」

■魚排驚現人頭咁大嘅水母，唔好手多多掂佢呀，可能有毒o架。

■蝦殼隨手掉入海，魚群立即蜂擁而上，開大餐。

好味海鮮唔好俾佢停，北海道帶子刺身超巨型，每公斤只得18至20隻，肉厚鮮甜，大大啖咬好過癮。北韓馬糞膽一啲都唔腥，價錢抵到爛，每板$65，喪食幾板都唔肉赤。車厘蜆又係大隻啫，味道鮮甜到可以直接用嚟做刺身，勁爽口嗰隻。法國生蠔FineDeCancale好Creamy，無吹水，真係滑到自動跣入喉嚨，而澳洲生蠔CoffinBay正值當造期，海水味較重，我又一食半打。仲有仲有，仲有翡翠螺，大大隻口感勁煙韌，我為食，又KO咗半打。熱食方面，可以試試煙熏鱔片，通常用嚟做前菜，肥美多汁味道一流。