中銀人壽保險近年搞得有聲有色，08年底加盟做執行總裁嘅蔡中虎真係功不可沒，佢唔使3年，就將市場佔有率由原本排名第七，喺今年首季推高到坐上一哥嘅寶座，提早達標。有咁嘅成績，CF（行內對中虎兄嘅暱稱）真係付出唔少！
CF入職中銀人壽之際，正值金融海嘯，不過佢無懼風暴，拍板製作令中銀人壽形象煥然一新嘅廣告──「因為愛．張文樂篇」，結果贏晒市場口碑同業內大獎，兼贏埋唔少生意㖭！
廣告界靚太與愛兒出鏡
講番呢個經典廣告，CF話嗰陣公司無預留budget，於是佢就靠慳埋啲送畀客戶嘅贈品，cutcut埋埋儲錢拍。廣告出街之後，唔少人想搵有氣質又有洋味嘅女主角「張文樂」拍廣告，原來伊人家陣喺外國升學；至於個靚仔「老竇」，就接廣告接到手軟。
CF話，呢個禮拜佢哋會推出續集篇──「愛．重量」，靚仔慈父同奀皮女組合換成可愛肥仔同真媽咪。華華噚日睇過廣告毛片，媽咪係嚟自廣告界，拍住天真爛漫嘅肥仔愛兒粉墨登場，同「假細佬」好似一家人咁，而肥仔喺廣告入面話：「媽咪我實孭得起你！」呢句係想提醒為人父母，喺全球老化嘅趨勢之下，要趁早諗吓下一代同自己嘅保障。
照華華睇，CF固之然有眼光，但中銀人壽更有眼光，搵到CF呢個食腦高手！
李華華
mailto:[email protected]