好耐好耐之前，有隻番鬼青蛙，佢尋尋覓覓，希望遇到公主，然後喺一吻之後令佢變返王子；若干年之後嘅噚日，有隻國產青蛙，佢等緊成班公主嚟錫佢，幫佢變成王子……
推介會開場 主席搞爛gag
內地兒童護理產品品牌青蛙王子（1259），噚日喺黃雨警告之下舉行投資者推介會，創辦人兼主席李振輝先發制人搞爛gag：「大家好，我是青蛙王子……的董事長！」全場靜晒。咁都未夠，連負責包銷嘅建銀國際CCBI整畀投資者嗰份推介報告，都以《Kiss this frog》為主題，成件事，夠晒格林童話feel！
咁呢隻青蛙到底夠唔夠斤両變成真正嘅王子呢？翻查招股書，青蛙王子原來喺好多個sector都做唔到一哥，好似護膚產品、兒童沐浴露同口腔產品，佢嘅市場佔有率都只係做老二，分別輸畀莊臣同高露潔呢兩個外國大牌子；再者，呢類內地消費概念公司，站喺香港投資者（諸如華華呢類「散戶中嘅散戶」）角度睇，最驚係佢啲產品出事，所以，要得到公主（投資者）一吻，班護航軍團真係要出力喇！
話時話，內地嘅兒童產品品牌好似對青蛙情有獨鍾，淨係計上咗市嘅公司，就先有博士蛙，再有青蛙王子，據行內人講，係因為青蛙係益蟲，又代表努力向上……總之最緊要個股價唔好係井底蛙就得喇！
mailto:[email protected]