花旗股市上禮拜顯著回落，影響噚日港股氣氛，恒指以全日低位開出後逐步回升，連續第二日企喺10日線樓上，守穩22000關，反彈嘅勢未完。
溫總歐洲之行嘅言論反映中央調控措施近尾聲，弦外之音仲有刺激經濟嘅味道，不過通脹威脅未除，相信推動經濟嘅主導行業會傾向選擇性，除咗噚日講嘅汽車股之外，獲放水嘅行業，內銀股自然唔少得，噚日已見郁郁吓。
農行C輪29884：農業銀行（1288）收4.06元，升1.5%。股價前日喺低位掉頭回升，噚日進一步向4.10元推進，短線有機會升越4.16元再上試4.33元，技術走勢對辦，成交算係暢旺，可以諗吓隻C輪29884。
隻輪現價13仙，2011年10月3日到期，行使價4.38元，溢價11.1%，引伸波幅29.5%，槓桿率31.2倍（有效10.6倍），正股升上4.33元，29884睇24.4仙，正股跌穿3.96元就沽咗隻輪。
俊樺