上魚排釣魚，魚毛三兩條都總算係收穫，最重要係呢三兩條魚毛，係自己釣嘅！咁生猛，最好搵間餐廳加工，蒸炒燜燉乜都好，擺埋入肚最開心。
記者：徐務研
攝影：陳陶鈞
Model：Alina@hkmodelhouse
獨木橋穩如泰山
靚女大晒！話說同Alina去「西貢雞籠灣海上釣魚樂園」排釣，其間某釣友人有三急，叫Alina幫手拎住支魚竿，點知釣友返嚟唔夠半分鐘，即有大魚上釣，Alina即叫：「我o架，條青斑我釣o架！」擺明屈，釣友亦樂意被屈。有收穫，Alina話要參觀魚排，先過一條疑似獨木橋嘅木板，木板望落又窄又薄，過橋險象環生，好彩，兩個我咁重嘅攝影師走過，木板一樣穩如泰山。魚排有好多大魚，有啲海斑養咗好幾年，係賣畀海鮮酒家嘅貴價貨，Alina一撒魚餌，大海斑即時以炮彈速度上水搶食，水花四濺。
雖然係屈番嚟嘅，但既然有收穫，當然要到餐廳加工，租開快艇玩Wakeboard，即叫船家駛去「糧船灣（有利）海鮮魚村」，餐廳對開沙灘零污染，老闆Simon解畫：「我答應過客人會好好打理沙灘，後來想到個妙計，如果小朋友幫手清理沙灘，我免費請食雪糕！」
加工費每斤$40
食自己釣番嚟嘅海鮮，特別滿足，加工費每斤$40，即釣即煮味道一定正。釣唔到魚都唔使愁，「有利」一樣有靚靚海鮮食。
最特別係盲蟹，只得半隻手掌大，一定要用人手捕捉，肉甜勁多膏，正！再試椒鹽鮮魷，外形似薯條，炸得乾爽唔油膩，絕對係心機作。蒜茸蒸扇貝也絕非普遍貨色，扇貝野生捕捉，再放到三十呎海底養到肥肥白白，殼上面嘅青苔就係新鮮鐵證，入口超鮮甜！生滾泥鯭粥用嘅係深海泥鯭，無泥味，每啖粥都咁鮮。白烚海跳螺，肉身扁扁很爽口。白胡椒湯浸花甲一樣食到我舐舐脷，花甲肉超嫩滑，無得彈。
排釣：西貢雞籠灣海上釣魚樂園（94358592）
地址：西貢雞籠灣魚排區
收費：日釣$120（最少三位，包來回快艇接載，西貢市中心碼頭上船）
水上活動：SAIKUNGBOOKING28.COM（65162828）
收費：每小時$480（快艇連Wakeboard，兩小時起）
糧船灣（有利）海鮮魚村（27911822）
地址：西貢糧船灣沙橋村