「這麼好的公司，這麼好的企業，這麼低的股價，不滿意。」邊個咁勞嘈？就係恒大地產（3333）主席許家印(圖）。究竟乜嘢令到堂堂內房老闆變憤青？
恒大上市只係兩年，舊年許總已經榮升內房銷售「冧巴two」，淨係用兩年時間就做到咁好成績，應該值得高興。不過，公司股價就真係有啲差強人意，招股價三個半，09年11月5號掛牌升到最高嘅四個八，上個月見過上市以嚟新高5.89蚊，但上周五收4.93蚊，差唔多返去兩年前上市首日嗰個位。難怪許老闆趁酒會同傳媒交流，兩杯到肚，嚟個大控訴，怪罪於「大鱷」。
佢話：「香港股票市場中嘅對冲基金，做空（沽空）之餘，還要造謠！」輪商都一樣，喺窩輪到期前造謠，許老闆大罵，「恨他們」，仲話「會報仇」。至於點報仇？佢話「未想到！」
許老闆又唔使太上心嘅，華華見唔少香港報紙投資版，都有唱好恒大嘅言論，唔係一味踩，至於點解唱極都唔升，就見仁見智。